काठमाडौँ । वेस्ट इन्डिजले २०२३ को एकदिवसीय विश्वकप गुमाउने भएको छ । सुपर सिक्स अन्तर्गत स्कटल्यान्डसँग शनिबार भएको खेलमा पराजित भएसँगै दुई पटकको एकदिवसीय विश्वकप विजेता वेस्ट इन्डिज पहिलो पटक विश्वकप गुमाउन पुगेको हो ।
जिम्बावेमा जारी विश्वकप छनोटमा सुपर सिक्सबाट शीर्ष दुईमा रहने टिममात्र छनोट हुने भएकाले वेस्ट इन्डिज शनिबारको खेलमा पराजित भएसँगै छनोट चरणबाटै बाहिरिएको हो । वेस्ट इन्डिजले टी–२० विश्वकपको समेत दुइपटकको विजेता हो ।
वेस्ट इन्डिजले सुरुवाती दुई विश्वकप जितेको थियो । उसले १९७५ र १९७९ को विश्वकप जितेको हो । साथै १९८३ मा उपविजेता समेत बनेको थियो ।
वेस्ट इन्डिज एकदिवसीय सुपर लिगमा नवौं स्थानमा रहेपछि एकदिवसीय विश्वकप छनोटमा धकेलिएको थियो । एकदिवसीय सुपर लिगमा शीर्ष ८ टिमले सोझै विश्वकपमा स्थान बनाउने गरेका छन् । १० टिमबिच एकदिवसीय विश्वकप क्रिकेट प्रतियोगिता हुने गरेको छ ।
जित्नै पर्ने दबाब रहेको खेलमा पहिले ब्याटिङ गरेको वेस्ट इन्डिज ४३.५ ओभरमा अलआउट हुँदै १ सय ८१ रनमा समेटिन पुग्यो । उसका लागि ज्यासन होल्डरले ४५ रन, रोमारियो सेफर्डले ३६ रन बनाउँदा निकोलस पुरनले २१ रन बनाए । त्यस्तै, साइ होपले १३ रन बनाएका थिए ।
स्कटल्यान्डले ३९ बल बाँकी हुँदै ७ विकेट गुमाएर लक्ष्य पुरा गरेको थियो । उसका लागि म्याथ्यु क्रसले सर्वाधिक ७४ रन बनाउँदै अविजित रहँदा ब्रान्डन म्यामुलेनले ६९ रन बनाए ।
