काठमाडौँ । भारत १४ औं संस्करणको साफ च्याम्पियनसिपको फाइनलमा प्रवेश गरेको छ । शनिबार राति भएको सेमिफाइनल खेलमा लेवनानलाई पेनाल्टीमा ४–२ ले हराउँदै घरेलु टोली भारत उपाधि नजिक पुगेको हो ।
बैंगलोरस्थित श्री कान्तीरवा मैदानमा भएको खेलको निर्धारित र अतिरिक्त समयमा पनि गोल हुन नसकेपछि खेलको छिनोफानो पेनाल्टीबाट लागेको हो ।
पेनाल्टीको पहिलो गोल भारतका कप्तान सुनील क्षेत्रीले गरे । लेवनानका हसन माटोउक गोल गर्न चुके । त्यसपछि भारतका अनवार अलीले गोल गरे । लेवनानका वालिम शोरले पनि गोल गर्दा भारत २–१ ले अघि रह्यो ।
त्यसपछि भारतका महेश सिंहले गोल गरे । यता लेवनानका मोहमद सदिकले गोल गरे । यस्तै, भारतका उदान्त सिंह कुमामले गोल गर्दा लेवनानका खालिल बदेर गोल गर्न चुकेपछि भारत ४–२ ले विजयी बन्यो ।
भारतले अब उपाधिका लागि कुवेतसँग प्रतिस्पर्धा गर्नेछ । शनिबार नै भएको अर्को सेमिफाइनलमा बंगलादेशलाई १–० गोलले पराजित गर्दै कुवेतले फाइनलमा स्थान बनाएको हो । भारत र कुवेतबीचको फाइनल खेल मंगलबार राति ७ः४५ बजे हुनेछ ।
