काठमाडौं । लामो समयको अन्योलमा रहेको एसिया कप क्रिकेट पाकिस्तान र श्रीलङ्कामा हुने भएको छ । एसियन क्रिकेट काउन्सिल (एसीसी) ले पाकिस्तानी क्रिकेट बोर्डले प्रस्ताव गरेको ‘हाइब्रिड मोडल’ अनुसार प्रतियोगिता पाकिस्तान र श्रीलङ्कामा हुने लगभग टुंगो लगाएको हो ।
क्रिकइन्फोले जनाएअनुसार ‘हाइब्रिड मोडल’ अनुसार प्रतियोगिताका १३ मध्ये ४ वा ५ वटा खेलहरू पाकिस्तानमा हुनेछन् भने बाँकी खेलहरू श्रीलङ्कामा आयोजना हुने छ ।
भारत पाकिस्तान नजाने भएपछि प्रतियोगिताका सबै खेल श्रीलङ्कामा खेल्नेछ । यदि भारत फाइनलमा पुगेको खण्डमा फाइनल पनि श्रीलंकाले नै आयोजना गर्नेछ ।
क्रिकइन्फोको रिपोर्ट अनुसार एसीसीले यो सप्ताहान्तपछि प्रतियोगिता आयोजनास्थलबारे आधिकारिक घोषणा गर्ने छ । प्रतियोगिता १ देखि १७सेप्टेम्बर सम्म हुनेछ ।
पाकिस्तान र भारतबीचको राजनीतिक विवादले गर्दा एसिया कप हुने नहुने अन्योलमा परेको थियो। पाकिस्तानले एसिया कप आफ्नै होम ग्राउण्डमा गराउन अडान राखेर हाइब्रिड मोडल प्रस्ताब गरेको थियो । तर, एसीसीलेकुनै रुचि देखाएको थिएन । पछि, पाकिस्तानले युएईलाई दोस्रो आयोजनास्थलका रूपमा अघि सारेको थियो । तर, बंगलादेशले त्यहाँको उच्च तापक्रमलाई देखाएर असहमति जनाएको थियो ।
नेपाल पनि एसिया कपमा सहभागिता जनाउदै छ । यस प्रतियोगिता अन्तर्गत नेपालले समूह चरणमा भारत र पाकिस्तानसँग भिड्ने छ । अर्को समूहमा श्रीलङ्का, बंगलादेश र अफगानिस्तान रहेका छन् ।
