काठमाडौं । महिला टि२० आईको दोस्रो खेलमा नेपालले घरेलु टोली मलेसियामाथि ७ विकेटले पराजित गरेको छ । यससँगै यस सिरिजमा नेपाल र मलेसिया १-१ को बराबरीमा रहेको छ ।
जितको लागि मलेसियाले दिएको ९७ रनको लक्ष्य पछ्याएको नेपालले १७.३ ओभरमा ३ विकेट गुमाउँदै पूरा गर्यो । नेपालको जितमा कप्तान रुविना क्षेत्री बेलबासे २१ बलमा २९ रनमा नट आउट रहिन् । नेपाललाई ओपनर कविता कुँवरले ४३ बलमा २ चौकासहित २६ रन बनाइन् भने सीता रानामगर २२ बलमा २ चौका र १ छक्कासहित २३ रनमा बोल्ड आउट भइन् । विन्दु रावलले १७ रन बनाईन भने सम्झना खड्का २ रनमा नटआउट रहिन् ।
यस्तै बलिङतर्फ मलेसियाकी ऐश्या एलिसा, निक नुर र विनीफ्रन्ड आनीले समान एक विकेट लिए ।
त्यसअघि टस जितेर पहिला ब्याटिङ रोजेको मलेसियाले निर्धारित २० ओभरमा ५ विकेट गुमाउँदै ९६ रन बनाएको थियो । मलेसियाको लागि मास एलिसा यासमिन जुक्किफीले सर्वाधिक २८ रन बनाएकी थिइन् । जुलिया र विनीफ्रेदले समान २० रन बनाउदा हामिजाह हाशिम १४ रनमा नटआउट रहिन् ।
नेपालको लागि कप्तान रुविना क्षेत्री बेलबासेले ४ ओभरमा १६ रन खर्चेर २ विकेट लिइन् । इन्दु बर्मा ४ ओभरमा ११ रन खर्चेर १ विकेट लिए ।कविता कुँवरले ३ ओभरमा ९ रन खर्चेर १ विकेट लिइन् ।
सोमबार भएको पहिलो खेलमा नेपाल मलेसियासँग ५० रनमा अल आउट हुँदै ५ विकेटले पराजित भएको थियो । अब नेपालले जेठ १८ मा (जुन १) मा तेस्रो खेल खेल्नेछ भने जेठ २० र २१ (जुन ३ र ४) मा चौथो र पाँचौं खेल खेल्नेछ।
नेपालको टोली :- रुविना क्षेत्री बेलबासे (कप्तान), सीता रानामगर, इन्दु बर्मा, कविता कुवँर, कविता जोशी, अश्मिना कर्माचार्य, कृतिका मरासिनी, विन्दु रावल, अप्सरी बेगम, काजोल श्रेष्ठ, सम्झना खड्का, ईश्वरी विष्ट, ज्याति पाण्डे र सरस्वती चौधरी ।
