विराटनगर । प्रदेश १ को सभामुखमा माओवादी केन्द्रका सांसद बाबुराम गौतमको एकल उम्मेदवारी परेको छ ।
सभामुखको निर्वाचनका लागि आज बिहान ११ बजे बैठक बस्न लागेको प्रदेश सभा सचिवालयले जानकारी दिएको छ । सोहि बैठकले गौतमलाई निर्वाचित भएको घोषणा गर्ने बताईएको छ ।
ज्येष्ठ सदस्य गयानन्द मण्डलले माओवादी उम्मेदवार गौतमलाई निर्विरोध निर्वाचित भएको घोषणा गर्ने तयारी गरिएको छ । गौतमलाई सत्ता पक्ष र प्रतिपक्षी दल दुबैको समर्थन रहेको छ ।
संसद् सचिवालयका प्रमुख गोपाल पराजुलीका अनुसार गौतमले आजै १ बजे शपथ ग्रहण गर्ने कार्यक्रम रहेको छ । उनलाई प्रदेश प्रमुख परशुराम खापुङले शपथ गराउने छ ।
माओवादी केन्द्रका केन्द्रीय सदस्य समेत रहेका गौतम ओखलढुङ्गाको प्रदेशसभा २(१) बाट प्रत्यक्ष निर्वाचित भएका थिए ।
