काठमाडौँ । प्रधानमन्त्री पुष्पकमल दाहाल प्रचण्डले नेकपा (माओवादी केन्द्र) निकट युवाहरुको संगठन बाईसीएललाई पार्ट र सरकारलाई सफल बनाउन संस्थागत पहल गर्न निर्देशन दिनुभएको छ ।
नेकपा (माओवादी केन्द्र) का अध्यक्षसमेत रहनुभएका प्रधानमन्त्री प्रचण्डले वाईसीएलको बैठकलाई सम्बोधन गर्दै संगठन विस्तार गरेर पार्टीलाई सुदृढ बनाउन लाग्न निर्देशन दिनुभयो ।
क्रान्तिबाट संघीय लोकतान्त्रिक गणतन्त्र स्थापना गर्ने अवसर प्राप्त भएको भन्दै उहाँले त्यस्तो चुनौतीपूर्ण अवस्थामा संविधान घोषणा गरिएको बताउनुभयो ।
संविधानको कार्यान्वयन प्रक्रिया पनि आफ्नै नेतृत्वको सरकारले बनाएको भन्दै प्रधानमन्त्री प्रचण्डले पहिलो कार्यकालमा मध्यपहाडी लोकमार्ग, उत्तर–दक्षिण करिडोर, गरिब किसानको ऋण मुक्त गर्ने निर्णय गरिएको तर कार्यान्वयन गर्न नपाएको उल्लेख गर्नुभयो । त्यस्तै आफ्नो दोस्रो कार्यकालमा लोडसेडिङको अन्त्य गरेको उहाँको भनाइ थियो ।
अहिले आफूले एउटा संकल्पका रुपमा लिएको भन्दै उहाँले भन्नुभयो, “यो म एक्लैले गरेर सम्भव हुने कुरा छैन । हामीलाई विभिन्न उपलब्धि प्राप्त गर्नका लागि पार्टीका जनसंगठन र युवाहरूले नै महत्त्वपूर्ण भूमिका खेलेको हो ।”
