काठमाडौँ । काठमाडौँ महानगरपालिकाका प्रमुख बालेन्द्र (बालेन) साहले ई–स्पोर्टसका लागि छुट्याइएको बजेट कुनै अमुक संस्था वा खेलका लागि नभएको स्पष्ट पारेका छन् ।
काठमाडौँ महानगरपालिकाले ई–स्पोर्ट्सको विकासका लागि भन्दै एक करोड रुपैयाँ बजेट छुट्याएको विषयमा विवाद उत्पन्न भएपछि उनले ई–स्पोर्ट्सलाई व्यवस्थित र सिर्जनशील बनाउनका लागि महानगरले बजेट छुट्याएको बताए ।
सामाजिक सञ्जाल फेसबुकमार्फत उनले आधुनिक विश्वमा ई–स्पोर्टस खर्बौंको आर्थिक योगदान गर्ने विधा भएको उल्लेख गर्दै भनेका छन्, “नेपालमा पनि यसको व्यावसायिक पाटो बढ्दैछ भने यही बर्ष हुने एसियाली खेलमा ई–स्पोर्टस पनि समावेश हुनेछ र योग्य रहेमा नेपाली ई–स्पोर्टसका खेलाडीहरुले पनि सहभागी भएर राष्ट्रको गरिमा बढाउन सक्नेछन् ।”
उनले कानूनले तोकिएबमोजिमको प्रक्रिया अपनाएर पारदर्शी किसिमले बजेट कार्यान्वयन हुने भन्दै फलानो संस्था वा फलानो खेलका लागि सुनिश्चित गर्ने जस्ता गैरकानूनी र अनैतिक कार्यमा महानगर सामेल नहुने स्पष्ट गरेका छन् ।
साथै महानगरप्रमुख शाहले यो विषयलाई लिएर अतिरञ्जित र अनैतिकरुपमा आफ्नो नाम जोडिएका समाचारहरुको खण्डन गर्दै पत्रकारिताको मर्यादाभित्र बसेर आफ्नो कार्य गर्न, गराउन अनुरोध गरेका छन् ।
