प्रतिनिधि सभाको बुधबारको बैठकमा बोल्दै सांसद झाले नदीमा बग्ने बालुवा तथा जंगलबाट बगेर आउने काठको समयमै व्यवस्थापन गर्न नसक्दा ती प्राकृतिक स्रोत नै विपत्तिको कारण बन्न पुगेको बताउनुभयो ।
उहाँले प्रकृतिले दिएका स्रोतको उचित सदुपयोग गर्न नसक्दा वरदान बन्नुपर्ने स्रोत अभिशापमा परिणत भइरहेको बताउनुभयो । विशेषगरी बाढीका बेला नदीमा ठूलो परिमाणमा बगेर आउने बालुवा र काठ तराईतर्फ थुप्रिँदा नदीको सतह बढ्नुका साथै बस्ती र खेतीयोग्य जमिनमा क्षति पुग्ने गरेको उहाँको भनाइ थियो ।
सांसद झाले नदीमा पानीभन्दा बढी काठ बगिरहेको र बालुवा थुप्रिएर नदीको सतह बढिरहेको अवस्था देखिएको उल्लेख गर्दै स्वदेशमै उपलब्ध प्राकृतिक स्रोतको उचित व्यवस्थापन गर्न नसक्नु नीतिगत कमजोरी भएको बताउनुभयो ।
उहाँले भन्नुभयो, “नदीमा पानीभन्दा बढी काठ बगेको हामीले देखिरहेका छौँ, बालुवा थुप्रिएर नदीको सतह बढेको छ । यसरी हाम्रो प्रकृति र स्रोतहरू खेर गइरहेका छन्, तर हामी भने मलेसियालगायतका विभिन्न देशबाट काठ आयात गरिरहेका छौँ ।”
सांसद झाले नदीजन्य पदार्थ तथा वनजन्य स्रोतको वैज्ञानिक र व्यवस्थित व्यवस्थापनका लागि सरकारले तत्काल योजना बनाएर कार्यान्वयन गर्नुपर्ने माग गर्नुभयो । प्राकृतिक स्रोतको व्यवस्थित परिचालन गर्न सके विपद्को जोखिम न्यूनीकरणसँगै मुलुकले आर्थिक लाभसमेत लिन सक्ने उहाँको भनाइ थियो।
