काठमाडौं । सभामुख डोलप्रसाद अर्यालले युवाको सीपलाई रोजगारी र उत्पादनसँग जोड्दै स्वदेशमै अवसर सिर्जना गर्ने वातावरण बनाउनुपर्ने बताउनुभएको छ।
श्रम, रोजगार तथा सामाजिक सुरक्षा मन्त्रालयले बुधबारदेखि कोशी प्रदेशबाट सुरु गरेको ‘श्रमाधान सीप तथा रोजगार मेला, २०८३’ को उद्घाटन गर्दै सभामुख अर्यालले सीप अतिरिक्त योग्यता मात्र नभई व्यक्ति, समाज र राष्ट्रको समृद्धिको आधार भएको बताउनुभयो।
उहाँले संविधानले रोजगारी तथा श्रमसम्बन्धी हकलाई मौलिक हकका रूपमा सुनिश्चित गरेकाले त्यसलाई व्यवहारमा अनुभूति हुने गरी रोजगारीका अवसर सिर्जना गर्नुपर्नेमा जोड दिनुभयो।
राष्ट्रिय जनगणना २०७८ अनुसार नेपालको कुल जनसंख्याको ६६ प्रतिशतभन्दा बढी हिस्सा श्रमयोग्य उमेर समूहमा रहेको उल्लेख गर्दै उहाँले यसलाई जनसांख्यिक लाभांशका रूपमा उपयोग गर्नुपर्ने बताउनुभयो। बजारको मागअनुसार सीप, सीपअनुसार रोजगारी र रोजगारीसँग जोडिएको उत्पादनलाई श्रम तथा रोजगार नीतिको महत्वपूर्ण आधार बनाउनुपर्ने उहाँको भनाइ थियो।
सभामुख अर्यालले आफू श्रम मन्त्रालयको नेतृत्वमा रहँदा २०८१ जेठ १७ गते कोशी प्रदेशबाट सुरु गरिएको ‘श्रमाधान रोजगार मेला’ सातै प्रदेशमा सञ्चालन भएको स्मरण गर्नुभयो। उक्त मेलामा ४१ हजार ३२५ जनाले अवलोकन गरेको, १७ हजार ९२१ जनाले रोजगारीका लागि आवेदन दिएको र रोजगारदाताले १४ हजार ७८८ रोजगारीका लागि माग गरेको उहाँले जानकारी दिनुभयो।
स्वदेशमा रोजगारी खोज्ने युवा र जनशक्ति अभावमा विदेशी कामदार ल्याउनुपर्ने अवस्थाबीचको असन्तुलन अन्त्य गर्न सीप विकास र श्रम बजारबीच तालमेल आवश्यक रहेको उहाँले बताउनुभयो। ‘श्रमाधान कल सेन्टर’ लगायतका पहललाई थप प्रभावकारी बनाउँदै आन्तरिक रोजगारी विस्तार गर्नुपर्नेमा पनि उहाँले जोड दिनुभयो।
सभामुख अर्यालले मेला सीपमूलक, उत्पादनशील र मर्यादित रोजगारीतर्फको महत्वपूर्ण पहल भएको बताउनुभयो।
असोज २० गतेसम्म सात दिन सञ्चालन हुने मेलामा उद्यमशीलता, डिजिटल बजारीकरण, आतिथ्य सत्कार, सौन्दर्यकर्मी, खाना पकाउने तथा सेवा, विद्युतीय सवारी तथा वातानुकूलन उपकरण मर्मत र बारिस्तालगायत १० विषयमा निःशुल्क छोटो अवधिका व्यावहारिक तालिम सञ्चालन गरिनेछ।
मेलामा ६५ वटा स्टलमार्फत रोजगारदाता, तालिम प्रदायक संस्था तथा बैंक तथा वित्तीय संस्थाको प्रत्यक्ष सहभागिता रहने मन्त्रालयले जनाएको छ।
