परराष्ट्र मन्त्रालयका सहसचिवको नेतृत्वमा गएको टोलीले चिनियाँ पक्षसँग छलफल गर्दै सीमा क्षेत्रमा देखिएका समस्या तथा नाकासम्म पुग्ने सडकको अवस्थाबारे ध्यानाकर्षण गराएको हो । टोलीमा परराष्ट्र, अर्थ, पूर्वाधार विकास मन्त्रालय, सडक विभाग र सडक डिभिजन चरीकोटका अधिकारी सहभागी थिए ।
टोलीले सिन्धुपाल्चोकका सुरक्षा निकाय तथा प्रशासनका प्रतिनिधिसँग समन्वय गरी नाकाको वर्तमान अवस्था, सडकको भौतिक अवस्था र सञ्चालनमा देखिएका प्राविधिक कठिनाइबारे जानकारी लिएको थियो । अनुगमनका क्रममा नाकासम्म पुग्ने राजमार्गको अवस्थालाई विशेष प्राथमिकताका साथ अध्ययन गरिएको थियो ।
टोलीले सडकको कमजोर भौतिक अवस्थाका कारण नाका सञ्चालनमा दीर्घकालीन अवरोध आउन नदिन तत्काल सुधारका काम अघि बढाउनुपर्ने निष्कर्ष निकालेको छ । साथै, दुई देशबीचको आपूर्ति प्रणालीलाई सहज बनाउने विषयमा पनि छलफल भएको जनाइएको छ ।
अनुगमनपछि आयोजित बैठकमा नेपाली पक्षले सीमा नाकालाई थप गतिशील बनाउन तथा नेपाल–चीन व्यापारिक सम्बन्धलाई सुदृढ गर्न आवश्यक पूर्वाधार सुधारमा सहकार्य गर्न चिनियाँ पक्षसँग आग्रह गरेको थियो ।
सीमा क्षेत्रको सडक मर्मत तथा सुधारका लागि तत्काल काम अघि बढाउने र नाका सञ्चालनमा देखिएका व्यावहारिक जटिलता समाधान गर्ने विषयमा चिनियाँ पक्ष सकारात्मक देखिएको टोलीले जनाएको छ । यस्तै, सिन्धुपाल्चोकको स्थानीय प्रशासनले नाका सञ्चालनका लागि आवश्यक सुरक्षा तथा व्यवस्थापनमा सहजीकरण गर्ने प्रतिबद्धता जनाएको छ ।
सरकारको यो उच्चस्तरीय पहलले विभिन्न कारणले अपेक्षित रूपमा सञ्चालन हुन नसकेको तातोपानी नाकालाई थप प्रभावकारी बनाउँदै पूर्ण क्षमतामा सञ्चालन गर्न सहयोग पुग्ने अपेक्षा गरिएको छ ।
