काठमाडौँ । प्रतिनिधिसभा सदस्य निर्वाचनअन्तर्गत आज देशभर भएको मतदान छिटपुट सामान्य घटनाबाहेक समग्रमा शान्तिपूर्ण र उत्साहजनक रुपमा सम्पन्न भएको छ।
निर्वाचन आयोगले तोकेको समयअनुसार बिहान ७ बजे सुरु भएको मतदान साँझ ५ बजे सम्पन्न भएको हो। आयोगकी आयुक्त डा. जानकीकुमारी तुलाधरका अनुसार मतदानको समय साँझ ५ बजेसम्म तोकिए पनि सो समयसम्म मतदान केन्द्रको लाइनमा रहेका मतदातालाई भने मतदान गर्न दिइएको थियो।
आयोगका अनुसार हालसम्म कुनै पनि मतदान केन्द्रको मतदान औपचारिक रुपमा स्थगन भएको छैन। दोलखा, सर्लाही र रौतहटमा केही समय सामान्य विवाद उत्पन्न भए पनि ती स्थानमा समस्या समाधान भई पुनः मतदान सञ्चालन भएको थियो। दोलखाको तामाकोशी–४ स्थित मालु मतदानस्थलमा केहीबेर स्थगनपछि पुनः मतदान सञ्चालन गरिएको जनाइएको छ।
मतदानसम्बन्धी विस्तृत विवरण भने आज साँझ ६ः१५ बजे आयोगले आयोजना गर्ने पत्रकार सम्मेलनमार्फत सार्वजनिक गरिने जनाएको छ।
यस निर्वाचनमा पहिलो हुने निर्वाचित हुने प्रणाली (प्रत्यक्ष) तर्फ ६५ राजनीतिक दलका उम्मेदवारले ६१ वटा निर्वाचन चिह्नमार्फत प्रतिस्पर्धा गरेका छन्। प्रत्यक्षतर्फ तीन हजार १७ पुरुष, ३८८ महिला र एक अन्य गरी तीन हजार ४०६ उम्मेदवार चुनावी मैदानमा छन्।
त्यसैगरी समानुपातिक निर्वाचन प्रणालीतर्फ एक हजार ३६३ पुरुष र एक हजार ७७२ महिला गरी कुल तीन हजार १३५ उम्मेदवार प्रतिस्पर्धामा छन्। प्रत्यक्षतर्फ १६५ निर्वाचन क्षेत्र र समानुपातिकतर्फ ११० स्थानका लागि मतदान सम्पन्न भएको हो।
निर्वाचनमा कुल एक करोड ८९ लाख तीन हजार ६८९ मतदाता रहेका छन्, जसमा ९६ लाख ६३ हजार ३५८ पुरुष, ९२ लाख ४० हजार १३१ महिला र २०० अन्य मतदाता छन्। यसका साथै एक लाख ८६ हजार १४२ अस्थायी मतदाता कायम गरिएको थियो।
निर्वाचनका लागि देशभर १० हजार ९६७ मतदानस्थलमा २३ हजार ११२ मतदान केन्द्र निर्धारण गरिएको थियो भने १४३ अस्थायी मतदानस्थल पनि तोकिएका थिए। ज्येष्ठ नागरिक, अपाङ्गता भएका व्यक्ति, अशक्त तथा गर्भवती महिलालाई सहज रुपमा मतदान गर्न प्राथमिकता दिने व्यवस्था गरिएको थियो।
निर्वाचनलाई सुरक्षित र व्यवस्थित बनाउन नेपाली सेना, नेपाल प्रहरी, सशस्त्र प्रहरी बल, राष्ट्रिय अनुसन्धान विभाग र निर्वाचन प्रहरी गरी ठूलो संख्यामा सुरक्षाकर्मी परिचालन गरिएको थियो ।
