काठमाडौं । प्रधानमन्त्री केपी शर्मा ओली र भारतीय प्रधानमन्त्री नरेन्द्र मोदीबीच संयुक्त राज्य अमेरिकाको न्युयोर्कमा भेटवार्ता हुने सम्भावना रहेको परराष्ट्र मन्त्रालय स्रोतले जनाएको छ ।
स्रोतका अनुसार सो भेटवार्ताका लागि यही सेप्टेम्बर २२ को साँझ ५:३० मा सो भेटका लागि प्रस्ताव गरिएको छ । सो समय दुवै तर्फको सहमतिबाट राखिएको बताइएको छ । “भारतीय पक्षले सो समयमा सहमति गरेको छ तर पनि भेट हुने विषयमा निश्चित गरेको छैन” परराष्ट्र मन्त्रालय स्रोतले जानकारी दियो ।
मोदी एक दिनका लागि मात्र न्युयोर्क जाँदैछन् । उनी २२ तारिखमात्र न्युयोर्क बस्ने भएकाले सोही समय प्रस्ताव गरिएको बताइएको छ । मोदी एक दिनमात्र रहने भएकाले उनले संयुक्त राष्ट्रसंघको ७९ औँ महासभालाई सम्बोधन भने भारतीय विदेशमन्त्री एस जयशंकरले गर्ने भएका हुन् ।
संयुक्त राष्ट्रसंघको ७९ औँ महासभामा सहभागिताका लागि प्रधानमन्त्री केपी शर्मा ओली २१ तारिख न्युयोर्क पुग्दैछन् । ओलीले भने राष्ट्रसंघको महासभालाई सम्बोधन गर्ने भएका छन् ।
परराष्ट्र मन्त्रालय स्रोत भन्छ “पहिले यो समय पनि तय भएको थिएन । भारतीय पक्षले प्रधानमन्त्री एक दिनका लागि मात्र जाने भएकाले समय नरहेको बताउँदै आएको थियो । अहिले यो समय दुबै पक्षबाट तय गरिएकाले भेटवार्ताको सम्भावना रहेको छ ।”
ओली नेपालको प्रधानमन्त्रीमा नियुक्त भएपछि नेपाल र भारतका प्रधानमन्त्रीबीच भेटवार्ता हुन सकेको छैन । महिना दिनमात्र अघि नेपालमा भारतीय विदेश सचिव आएका थिए र उनले प्रधानमन्त्री ओलीलाई भ्रमणको निमन्त्रणा गर्ने अनुमान गरिएको भएपनि आमन्त्रण गरिएन । त्यसपछि परराष्ट्र मन्त्री डा आरजु राणा देउवा भारत भ्रमणमा गएका बेला पनि मोदीले ओलीलाई भ्रमणका लागि आमन्त्रण गरेनन् ।
उता प्रधानमन्त्री ओलीले नै मोदीलाई नेपाल भ्रमणको निमन्त्रणा गरेका थिए । ओलीलाई भारतले भ्रमणको निमन्त्रणा नगरेको विषयलाई वर्तमान सरकारको भविष्यसँग जोडेर हेर्न थालिएको छ ।
दुई प्रधानमन्त्रीबीच यसअघि बिमस्टेकमा उनीहरुबीच भेटवार्ता गर्ने कार्यक्रम रहेको भए पनि त्यो पनि समय तय भएको थिएन । बिमस्टेकको सम्मेलन रोकिएपछि दुई प्रधानमन्त्रीबीच नेपालले न्युयोर्कमा भेट्ने कार्यक्रम बनाएको हो ।
