एजेन्सी । फिफा विश्वकप २०२२ आइतबारदेखि कतारमा सुरु हुँदैछ । विश्वकप खेल्नु भनेको खेलाडी र खासगरी युवा खेलाडीको सपना हुन्छ ।
कतारमा आयोजना भइरहेको यो विश्वकपमा केही युवा खेलाडी छन्, जो दबाबका बाबजुद पनि अनुभवविना देशका लागि ठूला स्टार बन्न सक्छन् । यी उदाउँदो ताराहरूका लागि फुटबलको संसारमा छाप बनाउने यो सुनौलो अवसर समेत रहेको छ ।
गारंग कुओल (अष्ट्रेलिया) उमेर १८ वर्ष
विश्वकपमा अस्ट्रेलियाका सबैभन्दा कान्छो खेलाडी हुन् गारंग कुओल । उनी ६ वर्षको उमेरमा परिवारसँग शरणार्थीको रूपमा अष्ट्रेलिया आएका थिए । १६ वर्षको उमेरमा उनले ए(लिग खेले । उनको राम्रो प्रदर्शनको कारण सेप्टेम्बर २०२२ मा प्रिमियर लिग क्लब न्यूक्यासलले उनलाई अनुबन्ध गरेको थियो ।
गाबी (स्पेन) उमेर १८ वर्ष
गाबी १७ वर्षको उमेरमा स्पेनका लागि डेब्यु गर्ने स्पेनका सबैभन्दा कान्छो खेलाडी बने । उनको उत्कृष्ट प्रदर्शनका कारण उनको तुलना स्पेनका पूर्व स्टार जेभियर हर्नान्डेज अर्थात् जाभीसँग भइरहेको छ ।
पेड्री (स्पेन) उमेर १९ वर्ष
पेड्रीले १७ वर्षको उमेरमा बार्सिलोनाबाट डेब्यु गरेका थिए । त्यसपछि उनी टोलीको महत्वपूर्ण खेलाडी बने । मिडफिल्डमा खेल्ने पेड्रीले बार्सिलोनाका लागि ३७ खेल खेलेका छन् । मार्च २०२२ मा १९ वर्षको उमेरमा उनले स्पेनका लागि डेब्यु गर्ने मौका पाए ।
जुड बेलिंगहम (इंग्ल्याण्ड) उमेर १९ वर्ष
उनले १६ वर्षको उमेरमा डेब्यु गर्दै सिनियर टोलीमा सबैभन्दा कान्छो खेलाडी बने । उनका बुबा मार्क र दाई अय्यूब पनि फुटबलर हुन् । बोरुसिया डर्टमण्डले २०२० मा जुडलाई आफ्नो क्लब इतिहासमा सबैभन्दा बढी रकममा किनेको थियो । मात्र १९ वर्षको उमेरमा जुडले कप्तानी पनि सम्हालेका थिए ।
जमाल मुसियाला (जर्मनी) उमेर १९ वर्ष
जमालले १७ वर्षको उमेरमा बायर्न म्युनिखबाट डेब्यु गरेका थिए । जमालको जन्म जर्मनीमा भएको थियो । त्यसपछि आमाबुवासँग उनको इंग्ल्याण्डमा बसोबास भयो । जमालले इङ्ल्यान्ड र जर्मनी दुवैबाट जुनियर स्तरमा खेलिसकेका छन् । तर, जर्मनीका लागि उनले सिनियर डेब्यु गरे ।
आन्सु फाती (स्पेन) उमेर २० वर्ष
फाती सानै उमेरमा स्पेनका उत्कृष्ट युवा खेलाडीहरूमध्ये एक हुन् । उनले २०१९ मा बार्सिलोनाबाट डेब्यु गरेका थिए र त्यसबेलादेखि उनी नियमित रूपमा टोलीको हिस्सा बनेका छन् । स्पेनका लागि ४ खेलमा एक गोल गरेका छन् । उनका दाजु र बुबा दुवै फुटबलर हुन् ।
एन्टोनी (ब्राजिल) उमेर २२ वर्ष
ब्राजिलमा एकभन्दा अर्का स्टारहरु छन् । युवा खेलाडी एन्टोनीले ११ खेल खेलेका छन् । तर, टोलीमा नेयमार, गेब्रियल जेससजस्ता स्टार रहेकाले विश्वकपको प्रारम्भिक ११ मा उनी छनोट हुन गाह्रो छ । उनी विकल्पका रूपमा आउन सक्छन् । उनले आयाक्सका लागि ५३ खेलमा १७ गोल गरेका थिए ।
ओरेलियन चुआमेनी
ओरेलियन एक रक्षात्मक मिडफिल्डर हुन् । सन् २०१८ मा आफ्नो रक्षात्मक खेलका कारण उनी चर्चामा आएका थिए । लगातारको प्रदर्शनका कारण उनले रियल म्याड्रिडसँग ६७६ करोडमा ६ वर्षको सम्झौता गरेका थिए । उनले फ्रान्सका लागि १४ खेल खेलिसकेका छन् ।
