बागलुङ । बागलुङको तमानखोला गाउँपालिकाको अध्यक्षमा नेपाली कांग्रेसका उम्मेदवार निर्वाचित भएका छन् । दुई हजार ७०७ मत ल्याएर जोकलाल बुढा अध्यक्ष पदमा निर्वाचित भएका हुन् ।
विसं २०७४ मा स्थानीय तहको निर्वाचनमा समेत निर्वाचित भएका बुढासँग पराजित भएका नेकपा (माओवादी केन्द्र) का उम्मेदवार देवबहादुर पुनले एक हजार ९९५ मत हासिल गरे । त्यस्तै नेकपा (एमाले) का देवेन्द्र छन्त्यालले ३९२ मत पाए ।
जिल्लाका अन्य पालिकामा पाँच दलीय सत्ता गठबन्धनबीच तालमेल भए पनि तमानखोलामा अध्यक्ष पदमा कांग्रेस र माओवादी केन्द्रले प्रतिस्पर्धा गरेका थिए ।
सो गाउँपालिकाको उपाध्यक्ष पदमा माओवादी केन्द्रकी निसु रसाइली एक हजार ९५८ मतसहित विजयी भइन् ।
छ वटा वडा रहेको सो गाउँपालिकामा वडा नं १, २ र ४ मा वडाध्यक्षमा माओवादी केन्द्र तथा वडा नं ३, ५ र ६ मा नेपाली कांग्रेसका वडाध्यक्ष उम्मेदवार विजयी भएका छन् ।
