काठमाडौँ । स्थानीय तह निर्वाचनमा पार्टीको विधान र अनुशासनविपरीत काम गरेको भन्दै नेपाली कांग्रेसले चितवनका एक पूर्वसांसद्सहित पाँच नेता तथा कार्यकर्तालाई निलम्बन गरेको छ ।
पार्टीको केन्द्रीय कार्यालयका कार्यवाहक मुख्यसचिव डा प्रदीप पराजुलीले चितवनस्थित भरतपुर–१ का पूर्वसांसद भीमबहादुर श्रेष्ठलाई निलम्बन गरिएको जानकारी दिनुभयो । उहाँका अनुसार भरतपुर–४ का नेपाल तरुण दलका पूर्व केन्द्रीय सदस्य शम्भुप्रसाद अर्याल, भरतपुर–१६ का क्षेत्रीय प्रतिनिधि सूर्य बस्नेत, भरतपुर–२ का तरुण दलका पूर्व जिल्ला सचिव आनन्दराज राउत र भरतपुर–८ का क्रियाशील सदस्य डा. केशव पौडेललाई पार्टी सदस्यबाट निलम्बन गरिएको हो ।
यसअघि स्थानीय तह निर्वाचनमा भरतपुर महानगरपालिकाबाट मेयरमा बागी उम्मेदवारी दिएका जगन्नाथ पौडेललाई पार्टीले निलम्बन गरेको थियो । पौडेलले पाँच दलीय गठबन्धनबाट नेकपा (माओवादी केन्द्र) का तर्फबाट मेयरमा उम्मेदवारी दिएकी रेनु दाहाल विरुद्ध स्वतन्त्र उम्मेदवारी दिएका थिए ।
