काठमाडौं । भोटेकोशी नदीमा आएको बाढीबाट प्रभावित रसुवा, नुवाकोट र धादिङका विभिन्न क्षेत्रमा दूरसञ्चार सेवा पुनःस्थापना गर्ने कार्य तीव्र पारिएको छ।
रसुवाको न्यौपानेचौर र राम्चे रिपिटर साइटमा हेलिकोप्टरमार्फत जेनेरेटर तथा ब्याट्री पठाएर आसपासका विभिन्न क्षेत्रमा सेवा सञ्चालनमा ल्याइएको छ। धुन्चेमा पनि जेनेरेटर, इन्धन तथा कर्मचारी परिचालन गरी दूरसञ्चार सेवा सञ्चालनको व्यवस्था गरिएको छ।
त्यस्तै, नुवाकोट र धादिङका मदनपुर, बट्टार, विदुर बसपार्क तथा बैरेनी–ठमेल डाँडालगायतका क्षेत्रमा जेनेरेटर, इन्धन र प्राविधिक जनशक्ति परिचालन गरी सेवा सुचारु गर्ने कार्य जारी रहेको जनाइएको छ।
महत्त्वपूर्ण साइटहरूमा सेवा निरन्तर सञ्चालनका लागि आवश्यक जेनेरेटर, इन्धन तथा कर्मचारी परिचालन गरिएको छ। नेटवर्क व्यवस्थापनअन्तर्गत सञ्चालनमा रहेका बीटीएसमा कभरेज, क्षमता विस्तार तथा अप्टिमाइजेसन गरी सेवा थप प्रभावकारी बनाइएको जनाइएको छ।
यसैबीच, प्रभावित सेवाग्राहीका लागि उपलब्ध निःशुल्क सुविधाको अवधि थप तीन दिन विस्तार गरिएको छ। अब भदौ १२, १३ र १४ गतेसम्म प्रभावित क्षेत्रमा भ्वाइस कल निःशुल्क, प्रतिदिन २ जीबी डेटा र ५० वटा एसएमएस निःशुल्क उपलब्ध हुने जनाइएको छ।
आवश्यक सहयोग तथा आपतकालीन सम्पर्कका लागि १२३४, १०० र १११४ मा सम्पर्क गर्न सकिनेछ।
