काठमाडौं । उपराष्ट्रपति रामसहाय प्रसाद यादवले रसुवाको भोटेकोशीमा आएको आकस्मिक बाढीबाट प्रभावित नागरिकको उद्धार, बेपत्ताको खोजी तथा घाइतेको उपचारमा प्रभावकारी ढंगले जुट्न सम्बन्धित सबैलाई आग्रह गर्नुभएको छ।
भदौ १० गते बुधबार भोटेकोशीमा आएको बाढीका कारण रसुवा, नुवाकोट, धादिङलगायत जिल्लामा ठूलो जनधनको क्षति भएको घटनाप्रति उपराष्ट्रपति यादवले दुःख व्यक्त गर्नुभएको हो।
उहाँले बाढीमा परी ज्यान गुमाएका नेपाली नागरिक, विदेशी पर्यटक तथा तीर्थयात्रीप्रति भावपूर्ण श्रद्धाञ्जली अर्पण गर्दै शोकसन्तप्त परिवारजनमा गहिरो समवेदना व्यक्त गर्नुभएको छ। साथै बेपत्ता भएकाहरूको शीघ्र खोजी तथा घाइतेहरूको शीघ्र स्वास्थ्यलाभको कामना गर्दै उनीहरूको यथोचित उपचारका लागि सम्बन्धित सबैमा आग्रह गर्नुभएको छ।
बाढीबाट प्रभावितहरूको उद्धार तथा सहयोगमा सरकार र सुरक्षाकर्मी सक्रियताका साथ परिचालित रहेको उल्लेख गर्दै उपराष्ट्रपति यादवले विपत्तिको यस कठिन घडीमा सम्पूर्ण नेपाली एकजुट भएर सामना गर्नुपर्ने बताउनुभएको छ।
उहाँले आ–आफ्नो स्तरबाट सम्भव सहयोग गर्न आग्रह गर्दै विपत्तिमा परेकाहरूलाई एक–अर्काको सहारा र सहयोगी बन्नु सामूहिक कर्तव्य भएको उल्लेख गर्नुभएको छ।
