दाङ । बुटवलमा भएको बम विष्फोटनको घटनामा नेकपा (बहुमत) को संलग्नता भएको आशंकामा पक्राउ परेका सो पार्टीका संयोजक धर्मेन्द्र बास्तोलालाई प्रहरीले करिब सात घण्टापछि छाडेको छ ।
दाङस्थित इलाका प्रहरी कार्यालय भालबाङले पोखराबाट नेपालगञ्ज जाँदै गरेका बास्तोलालाई बिहीबार बिहान ४ बजे नियन्त्रणमा लिएको थियो । बम विष्फोटको घटनामा सो पार्टीको संलग्नताको आशंकामा सोधपुछका लागि उनलाई नियन्त्रणमा लिएको भालुबाङ प्रहरीले जनाएको छ ।
सोधपुछका क्रममा सो पार्टीको संलग्नता नदेखिएपछि प्रहरीले उनलाई रिहा गरेको हो । बाँस्तोलासँगै प्रहरीले बास्तोलाका सहयोगीहरु राजेन्द्र साउद र अचल मोक्तानलाई पनि नियन्त्रणमा लिएर सोधपुछ गरेको थियो । उनीहरुलाई पनि प्रहरीले मुक्त गरेको छ ।
सोधपुछका क्रममा संयोजक बास्तोलाले नेकपा (बहुमत) ले चुनाव बहिष्कार गर्ने नीति नलिएको बताएका थिए । बास्तोला पक्राउ परेलगत्तै सो पार्टीको केन्द्रीय कार्यालय सदस्य हेमन्तप्रकाश वलीले पनि विज्ञप्ति जारी गर्ने पार्टीको चुनाव बहिष्कार गर्ने नीति नभएको बताएका थिए ।
