एजेन्सी । आईपीएलको ४८ औँ खेलमा पञ्जाब किंग्सले गुजरात टाइटन्सलाई ८ विकेटले पराजित गरेको छ । मुम्बईको डीवाई पाटिल स्टेडियममा भएको खेलमा पञ्जाबले दोस्रो इनिङ्समा ब्याटिङ गर्दै गुजरातको १४४ रनको लक्ष्य पछ्याएको हो ।
पञ्जाबका ब्याट्सम्यानले २४ बल बाँकी रहँदै सहजै लक्ष्य पछ्याएका थिए । यो सिजनमा पञ्जाबको पाँचौं जित हो भने गुजरातको दोस्रो हार हो । यो जितसँगै मयांक अग्रवालको नेतृत्वमा रहेको पञ्जाब टोली अंक तालिकाको पाँचौं स्थानमा उक्लिएको छ ।
गुजरातले दिएको १४४ रनको लक्ष्य पछ्याएको पञ्जाब किंग्सको सुरुवात राम्रो हुन सकेन । पहिलो पटक ओपन गर्न आएका जोनी बेयरस्टो तेस्रो ओभरमा एक रन बनाएर पेभिलियन फर्किए । तर, त्यसपछि शिखर धवनले भानुका राजपाक्षेसँग मिलेर इनिङ्सलाई सम्हाल्दै बलियो साझेदारी बनाए । दुवैले दोस्रो विकेटका लागि ८७ रन जोडे । यस क्रममा शिखर धवनले सिजनको आफ्नो तेस्रो अर्धशतक ३८ बलमा पूरा गरे । अर्कोतर्फ। भानुकाले २८ बलमा तीव्र पारी खेल्दै ४० रन बनाए । उनी १२औं ओभरमा फर्गुसनको बलमा एलबीडब्ल्यू आउट भए ।
त्यसपछि धवनले लियाम लिभिङस्टोनसँग मिलेर इनिङ्सलाई अगाडि बढाए । कुनै अतिरिक्त विकेट नगुमाई १६ ओभरमा लक्ष्य पछ्याए । दुवैले तेस्रो विकेटका लागि २४ बलमा ४८ रनको अतुलनीय साझेदारी गर्दै खेलको अन्त्य गरेका थिए । लिभिङस्टोनले शामीको कोटाको अन्तिम ओभरमा २८ रन बनाएर खेल २४ बल पहिले नै पञ्जाबको पोल्टामा पारे ।
यसअघि गुजरात टाइटन्सले टस जितेर पहिले ब्याटिङ गर्ने निर्णय गरेको थियो । गुजरातको सुरुवात निराशाजनक रह्यो । तेस्रो ओभरमा रनआउट भएपछि शुभमन गिल पेभिलियन फर्किए । यसपछि ऋद्धिमान साहा र त्यसपछि कप्तान हार्दिक पाण्डेय पनि छिट्टै आउट हुन पुगे । डेभिड मिलरले इनिङ्स सम्हाल्ने प्रयास गरे तर उनी पनि ११ रन बनाएर आउट भए ।
तेस्रो नम्बरमा ब्याटिङ गर्न आएका साई सुदर्शनले एक छेउ समातेर टोलीको स्कोरलाई निरन्तरता दिए । यस क्रममा उनले आईपीएलको आफ्नो पहिलो अर्धशतक पूरा गरे । सुदर्शनले राहुल तेवाटियासँग ४५ रनको साझेदारी गरे । तर उनी पनि धेरै टिक्न सकेनन् ।
कागिसो रबाडाले गुजरातलाई एकपछि अर्को झट्का दिए र कुनै पनि ब्याट्सम्यानलाई टिक्न दिएनन् । यही कारणले गर्दा गुजरातको टोलीले अन्तिम पाँच ओभरमा ४५ रन बनाउन सक्यो । यस अवधिमा चार विकेट गुमायो । साई सुदर्शनको ६५ रनको सहयोगमा गुजरातले २० ओभरमा आठ विकेट गुमाएर १४३ रन बनाएको थियो ।
