उत्तरी फिलिपिन्समा आँधीबाट २६ को मृत्यु

उत्तरी फिलिपिन्सको पहाडी इलाकामा पर्ने दुर्गम गाउँ मन्कायानमा उद्धारकर्ताहरुले पहिरोमा पुरिएका १३ जना कामदारको शव निकालेपछि सो सङ्ख्या २६ पुगेको हो ।
गोनी नामक यस आँधीबाट प्रभावित इलाकाबाट हजारौँ व्यक्ति भागेका बताइएको छ । सो पहिरोमा अझै कति कामदार बेपत्ता भएका छन भन्नेबारेमा भने आधिकारीक रुपबाट पुष्टि भएको छैन ।
गोनीका कारण उत्तरी फिलिपिन्सको ठूलो भाग एक हप्तादेखि प्रभावित भएको छ । यसबाट हजारौँ घर ध्वस्त भएको र १२ हजार व्यक्ति विस्थापित भएका छन् ।
मन्कायान खानीमा बेपत्ता भएका व्यक्तिहरुको आधिकारिक पुष्टि नगरिएको भए तापनि चार बेपत्ता भएको अनुमान गरिएको छ ।
फिलिपिन्समा हरेक वर्ष करिब २० वटा आँधी आउने गरेको छ । यस आँधीले जापानको क्युसु द्विपलाई प्रत्यक्ष प्रभाव पारेको जापान मौसम विज्ञान विभागले बताएको छ । रासस-एएफपी