पोखरा । नेपाल पुलिस क्लबले लिग उपविजेता सीएमजी क्लब संंकटालाई छैटौं संस्करणको मनकामना केबुलकार पोखरा कप फुटबल प्रतियोगितामा पराजित गरेको छ ।
पोखरा रंगशालामा शनिबार भएको अन्तिम प्रि–क्वार्टरफाइनलमा पुलिसले संकटालाई २–१ गोलअन्तरले पराजित गर्दै क्वार्टरफाइनल प्रवेश गर्न सफल भएको हो । अभिषेक रिजाल र रवि पासवानले गोल गरे ।
११औं मिनेटमै सुवास गुरुङको पासमा विदेशी खेलाडी म्याक्सवेल एलोनको गोलबाट अग्रता लिएको थियो । ३१औं मिनेटमा पुलिसका खेलाडी नीरकुमार राईको ब्याक पासमा अभिषेक रिजालले गोल गर्दै खेल बराबरीमा ल्याए । ५४औं मिनेटमा पुलिसका लागि रवि पासवानले गोल गर्दै टिमलाई अग्रता दिए । विपक्षी किपर राजाबाबु थापा बिट भएको अवस्थामा रविले बललाई जाली चुमाउन सफल भएका हुन् । रवि नै म्यान अफ दी म्याच घोषित हुँदै नगद ५ हजार पुरस्कार पाए । यस सिजनमा खप्तड गोल्डकपको सेमिफाइनलमा पुलिसले संकटालाई पराजित गरेको थियो । लिगमा भने संकटाले २–१ ले जित हात पारेको थियो । राजधानी दैनिकमा खबर छ ।
