विराटनगर । सरकारले अंगीकृत नागरिकता पाएका व्यक्तिका सन्तानलाई वंशजको आधारमा नागरिकता दिने बाटो खुला गरेपछि जिल्ला प्रशासन कार्यालय मोरङमा नागरिकता लिनेको भीड बढेको छ। नागरिकता दिन थालेपछि मोरङको जिल्ला प्रशासनमा टोकनको व्यवस्था गरिएको छ ।
मोरङका सहायक प्रमुख जिल्ला अधिकारी उमेशकुमार पाण्डेका अनुसार दैनिक सैयौंको संख्यामा नागरिकता लिन जिप्रका पुग्न थालेपछि भीडलाई व्यवस्थित गर्न प्रशासनले टोकनको व्यबस्था गरेको बताए । पाण्डेका अनुसार आइतबारबाट नागरिकता वितरण गर्न टोकन’ प्रणाली लागु गरेको हो । उनका अनुसार वैशाख ७ गते सम्मका लागि टोकन वितरण भइसकेको छ ।
गृह मन्त्रालयले चैत १९ गते ७७ वटै जिल्ला प्रशासन कार्यालयलाई परिपत्र गरी जन्मका आधारमा नागरिकता पाएका बाबुआमाका सन्तानलाई वंशजका आधारमा नागरिकता दिन निर्देशन दिएपछि नागरिकता लिनेको भीड लागेको हो। ‘नागरिकता लिन दैनिक सयौं आउने गरेका छन्’, पाण्डेले भने, ‘दैनिक दुई सयलाई नागरिकता दिने गरी टोकन वितरण गरिएको हो।’
आइतबारसम्म जिल्ला प्रशासनबाट ५ सय ८३ जनाले वंशजको नागरिकता लिएसकेका छन्। नागरिकता लिनेको संख्या एक्कासी बढेपछि जिल्ला प्रशासन कार्यालय मोरङले नागरिकता फाँटमा कर्मचारी पनि थपेको छ। सहायक प्रजिअ पाण्डेका अनुसार नागरिकता फाँटमा यसअघि ५ जना कर्मचारी रहेकोमा अहिले ९ जना छन्।
