काठमाडौं । प्रधानन्यायाधीशको चोलेन्द्र शमशेर जबरालाई सडकबाटै हटाउने अभियानका साथ आन्दोलनमा उत्रिएको नेपाल बारले राजनीतिक दलको सहयोग खोज्ने क्रमलाई निरन्तरता दिएको छ ।
प्रधानमन्त्री एवं नेपाली काँग्रेसका सभापति शेरबहादुर देउवा माओवादी केन्द्रका अध्यक्ष पुष्पकमल दाहाल, नेकपा एकिकृत समाजवादीका अध्यक्ष माधब कुमार नेपाल सहित अन्यदलका शिर्षनेतालाई भेटेका बारका पदाधिकारीहरुले आज १२ः३० बजे एमाले अध्यक्ष केपी ओलीसंग भेट गर्दै छन् ।
बारका महासचिव लिलामणी पौडेलले न्यूजपोलारसंग भन्नुभयो, 'न्यायलयभित्रको समस्याका बारेमा प्रमुख प्रतिपक्षदलका नेता ओलीलाई १२ः३० बजे भेट्दैछौँ । अहिलेसम्मको अवस्थाका बारेमा जानकारी गराउछौँ ।' यस अघि बारसंगको भेटमा प्रधानमन्त्री देउवाले राणालाई हटाउने बारे कुनै ठोस र सकारात्मक जवाफ नदिएपछि बारको टोली अलमलमा परेको थियो ।
उता दाहाल र नेपालले भने राणालाई हटाउन आफूहरुले सहयोग गर्ने बचन दिएका थिए । महाअभियोग बाहेक अन्य बिकल्पबाट राणा हटाउन नसक्ने अवस्था भएपछि संसदको सहयोग खोज्दै बार टोली ओलीकोमा पुग्न लागेको हो । न्यायलयको विषयमा एमाले अध्यक्ष ओलीले प्रधानन्यायधीशले मात्र राजीनामा दिएर समस्याको समाधान नहुने भन्दै परामादेश जारी गर्ने पाँच न्यायधीशले नै राजीनामा दिनुपर्ने दृष्टिकोण राख्दै आउनु भएको छ ।
