काठमाडौं । आगामी तिहारदेखि बेइजिङ-काठमाडौं सिधा उडान हुने भएको छ। हालै निर्माण सम्पन्न राजधानी बेइजिङभित्रको दोस्रो अन्तर्राष्ट्रिय विमानस्थल ‘तासिङ अन्तर्राष्ट्रिय विमानस्थल’ असोज १३ देखि संचालनमा आउने भएपछि सो विमानस्थल प्रयोग गर्ने उडानहरूको धमाधम टिकट बिक्री सुरु भएको छ।
चाइना डेलीका अनुसार चीनको राजधानी बेइजिङमा बनेको नवनिर्मित तासिङ विमानस्थललाई विश्वका भव्य विमानस्थलमध्येको एक मानिन्छ। तासिङ विमानस्थलबाट आन्तरिक उडान र बाह्य अन्तर्गत काठमाडौं, लण्डन, फिनल्याण्डको हेलसिन्की, मोरोक्कोको कासाब्लांका र जापानको फुकुओकाका लागि टिकट बुकिङ खुल्ला भएको उक्त संचार माध्यमले जनाएको छ ।
उक्त विमानस्थलबाट हिमालय एयरलाइन्सले पहिलो उडान गर्ने छ । हिमालय एयरलाइन्सको उडान समय बेइजिङ समयअनुसार साँझ १७–४० बजे उल्लेख गरिएको छ।
गत साउन १० गते नेपाल चीन हवाई सेवा सम्झौता पुनरावलोन गर्न बेइजिङ आएको संस्कृति, पर्यटन तथा नागरिक उड्डयन मन्त्रालयका सहसचिव सहितको प्रतिनिधि मण्डल र चिनियाँ उड्डयन प्रशासनबीच भएको वार्तामा बेइजिङ–काठमाडौं सिधा उडानका लागि चीनले सहमति जनाएको थियो।
सो सम्झौतापछि हिमालय एयरलाइन्सले सिधा उडान गर्ने भनिएको थियो। सम्झौतापछि नेपाली अधिकारीहरूले आगामी अगष्टमा हिमालय एयरलाइन्सले नयाँ विमान किन्ने वा पुरानैबाट भएपनि सिधा उडान गर्नसक्ने संकेत गरेका थिए।
