काठमाडौं । प्रधानमन्त्री केपी शर्मा ओलीले राजतन्त्र फर्काउँछौं भन्नु बेमौसमको बाजा भएको बताएका छन् ।
आइतबार संसदलाई सम्बोधन गर्दै उनले चिहानमा गएर हड्डी फुकेर राजसंस्था फर्काउँछु भन्ने परिकल्पना गरेर उफ्रिएको बताए । यो दाबीमा पत्यार नलागेर सरकार मौन बसेको भन्दै उनले भने, ‘पत्याएका दिन संविधान, गणतन्त्रको रक्षाका लागि सरकार मैदानमा उत्रिन्छ ।’
धैर्य गर्नुस्, निर्वाचनपछि मलाई पनि बस्न मन छैन
प्रधानमन्त्री ओलीले तत्काल सरकार परिवर्तन नहुने बताएका छन् । उनले आफ्नो पद गुम्छ कि भनेर आफू नडराएको समेत बताए । उनले भने, ‘मैले भनेको सुनेँ, प्रधानमन्त्री लगलग कामेर बसेको छ पद जाने भयो भनेर । मैले पद नगएको कोही देखेको छैन । कुनै न कुनै दिन जान्छ । आगामी निर्वाचनपछि मलाई पनि बस्न मन छैन ।’
उनले संविधानसम्मत चलेका कारण सरकार प्रशन्नातापूर्वक विरोध र आलोचनाको स्वागत गर्ने बताए । सरकारको आलोचनाका नाममा प्रणाली उल्टाउँछु, प्रतिगमन गर्छु भन्ने मान्य हुँदैन,’ उनले भने ।
प्रधानमन्त्री ओलीले संविधान, लोकतन्त्र, गणतन्त्र, संघीयता र जनताको शासन विरोधी क्रियाकलापहरु नगर्न समेत चेतावनी दिए ।
