काठमाडौँ । श्रम तथा व्यवसायजन्य सुरक्षा विभागले श्रमिकहरूलाई अनिवार्य रूपमा चाडपर्व खर्च उपलब्ध गराउन सबै रोजगारदाता तथा प्रतिष्ठानलाई निर्देशन दिएको छ।
विभागले श्रम ऐन, २०७४ को दफा ३७ बमोजिम प्रचलित धर्म, संस्कृति तथा परम्पराअनुसार मनाइने चाडपर्वका लागि प्रत्येक श्रमिकले आफूले खाइपाइ आएको एक महिनाको आधारभूत पारिश्रमिक बराबरको रकम प्रत्येक वर्ष चाडपर्व खर्चका रूपमा पाउने कानुनी व्यवस्था रहेको जनाएको छ।
विभागले उक्त कानुनी व्यवस्था कार्यान्वयन गरी श्रमिकलाई चाडपर्व खर्च उपलब्ध गराउन रोजगारदाता तथा प्रतिष्ठानलाई आग्रह गरेको छ।
चाडपर्व खर्च उपलब्ध नगराएमा सुविधा नपाउने श्रमिक वा कामदारले आफ्नो कार्यक्षेत्र पर्ने श्रम तथा रोजगार कार्यालय वा श्रम तथा व्यवसायजन्य सुरक्षा विभागमा उजुरी तथा निवेदन दिन सक्ने विभागले जनाएको छ।
विभागका अनुसार आवश्यक जानकारीका लागि विभागको वेबसाइटमा सूचना हेर्न सकिनेछ। त्यस्तै, उजुरी, गुनासो तथा सुझावका लागि विभागको इमेलमा सम्पर्क गर्न सकिनेछ। विभागले उजुरी तथा गुनासो दर्ताका लागि क्यूआर कोडसमेत उपलब्ध गराएको जनाएको छ।
