काठमाडौँ । नेपाली कम्युनिस्ट पार्टीका प्रमुख सचेतक युवराज दुलालले सरकारको पछिल्लो कार्यशैलीप्रति असन्तुष्टि जनाउँदै बाढी–पहिरो पीडितको राहत तथा पुनःस्थापनामा सरकार गम्भीर नभएको आरोप लगाउनुभएको छ ।
बिहीबार बसेको प्रतिनिधिसभाको बैठकमा विशेष समय लिएर बोल्दै प्रमुख सचेतक दुलालले प्रधानमन्त्रीले संसद्लाई जानकारी नदिई विदेश भ्रमण गरेको, प्राकृतिक विपत्तिका पीडितलाई राहत दिन ढिलाइ गरेको र सुशासनका नाममा केवल ‘स्टन्टबाजी’ गरेको आरोप लगाउनुभयो ।
प्रधानमन्त्रीले संयुक्त राष्ट्रसंघको महासभामा उठाएका विषय सकारात्मक भए पनि भ्रमणअघि र भ्रमणपछि संसद्लाई जानकारी नदिएर व्यवस्थापिकाको अपमान गरेको उहाँको भनाइ थियो ।
बाढी–पहिरोमा परी ज्यान गुमाएका तथा बेपत्ता नागरिकको अवस्थाप्रति सरकार उदासीन बनेको आरोप लगाउँदै दुलालले बेपत्ता नागरिकलाई तत्काल मृतकसरह कानुनी हैसियत प्रदान गर्न माग गर्नुभयो । पीडितलाई राहत र पुनःस्थापनाको कामलाई प्रभावकारी बनाउनुपर्ने उहाँले बताउनुभयो ।
राहत सामग्री गोदाममै थन्किएको र उपलब्ध रकमसमेत खर्च हुन नसकेको भन्दै उहाँले प्रशासनिक ढिलासुस्तीप्रति असन्तुष्टि जनाउनुभयो ।
भ्रष्टाचार नियन्त्रणको विषयमा दुलालले अघिल्लो सरकारका पालामा सुशासनको अभियान सुरु गरी ठूला भ्रष्टाचारका फाइल खोलिएकै कारण सरकार ढालिएको दाबी गर्नुभयो । सहकारी ठगी प्रकरणमा फरार रहेका जिबी राईलाई पक्राउ गर्नसमेत उहाँले सरकारको ध्यानाकर्षण गराउनुभयो ।
‘यदि सरकार साँच्चै भ्रष्टाचारीलाई कारबाही गर्न चाहन्छ भने बलिया आधारसहितका फाइलहरू खोलोस्, न कि स्टन्ट देखाएर जनतालाई भ्रममा राखोस्,’ उहाँले भन्नुभयो ।
पछिल्लो समय महँगी, बेरोजगारी तथा आधारभूत सेवासम्बन्धी समस्यामा सरकार मौन रहेको दुलालको आरोप थियो । रसुवा र कोरला लगायतका नाका बन्द हुँदा चाडपर्वको समयमा बजारमा सामान महँगिएको उल्लेख गर्दै उहाँले उच्चस्तरीय कूटनीतिक पहलमार्फत तत्काल नाका सञ्चालनमा ल्याउन माग गर्नुभयो ।
सरकारले सञ्चारमाध्यमलाई नियन्त्रण गर्न खोजेको र सांसदहरूको स्तर निर्धारण गर्ने जस्ता गतिविधिले प्रधानमन्त्रीको साख कमजोर बनाउने चेतावनीसमेत उहाँले दिनुभयो।
