बिहीवार राष्ट्रिय सभा बैठकमा बोल्दै सांसद विष्टले कारागार र निकुञ्ज प्रशासनमा भइरहेको भनिएको आर्थिक लेनदेनको विषयमा सरकारको गम्भीर ध्यानाकर्षण गराउनुभयो। उहाँले कारागार विभागका कैदीसँग प्रतिव्यक्ति एक करोड रुपैयाँसम्म र निकुञ्जका वार्डेनको सरुवामा २५ लाख रुपैयाँसम्म घुस लेनदेन भएको सार्वजनिक अडियो–भिडियो प्रकरणको निष्पक्ष छानबिन गर्न माग गर्नुभयो।
उहाँले यस्ता घटनाले सुशासनको नारा दिने सरकारको दाबीमाथि प्रश्न उठाएको भन्दै घटनाका मुख्य योजनाकारमाथि कडा कारबाही गर्नुपर्ने बताउनुभयो।
प्रधानमन्त्रीको संयुक्त राष्ट्रसंघको महासभामा सहभागिताका क्रममा भएको विदेश भ्रमणबारे पनि सांसद विष्टले प्रश्न उठाउनुभयो। प्रधानमन्त्री राष्ट्रको प्रतिनिधित्व गर्न विदेश जाने भएकाले कूटनीतिक भेटघाट र प्रभावकारी संवादलाई प्राथमिकता दिनुपर्ने उहाँको भनाइ थियो।
उहाँले भन्नुभयो, “प्रधानमन्त्री राष्ट्रको गौरवको प्रतिनिधित्व गर्न जानुभएको हो, कुनै ब्रान्डको प्रचार गर्न होइन। कूटनीतिक भेटघाट र प्रभावकारी संवादको साटो सस्तो प्रचारबाजीमा लाग्नु दुःखद् छ।”
सांसद विष्टले भोटेकोशी बाढीपीडितका लागि राहत वितरणमा भइरहेको ढिलाइप्रति पनि असन्तुष्टि जनाउनुभयो। सरकारले १५ अर्ब रुपैयाँ राहत संकलन गरेको दाबी गरे पनि हालसम्म करिब एक अर्ब रुपैयाँ मात्र परिचालन भएको भन्दै उहाँले पीडितको घाउमा मलम लगाउने गरी राहत तथा पुनःस्थापनाको काम अघि बढाउन माग गर्नुभयो।
