काठमाडाैँ । नेपाली कांग्रेसका सांसद कृष्णप्रसाद सिटौलाले प्रदेश सरकार ‘सरकार’जस्ता नभई ‘ईकाई’ जस्तो भएको टिप्पणी गर्नुभएको छ ।
राष्ट्रिय सभाको विधायन व्यवस्थापन समितिको बैठकमा बोल्दै उहाँले यस्तो टिप्पणी गर्नुभएको हो । उहाँले संविधानले कल्पना गरेको संघीय पद्धतिको मूल मर्म कार्यान्वयन नसकेको बताउनुभयो ।
उहाँले प्रदेशले विकास गर्नेदेखि बजेट निर्माण गरिरहेको भएपनि संघीयताको मूल उद्देश्यअनुसार प्रदेशलाई अधिकार सम्पन्न सरकारका रूपमा सञ्चालन गर्न नसकेको बताउनु भयो । उहाँले संविधानले संघ, प्रदेश र स्थानीय तहबीच अधिकार बाँडफाँड गरेको भएपनि त्यसको प्रभावकारी कार्यान्वयन हुन नसकेको बताउनु भयो । सिटौलाले प्रदेश सरकारले स्वतन्त्र रूपमा काम गर्न नसक्ने र केन्द्र सरकारले आवश्यक सहयोग गर्न नचाहने अवस्थाले संघीय शासन प्रणालीमै समस्या उत्पन्न भएको टिप्पणी गर्नुभयो ।
उहाँले भन्नुभयो,‘संविधानले सबै तहको अधिकार बाँडफाँड गर्यो । संघीय व्यवस्थाको कल्पना यसरी गरियो । तर त्यो पद्धतीको मौलिक पक्ष नै लागू भएन के । प्रदेश सरकार छ, सरकार जस्तो छँदै छैन । अहिलेसम्म प्रदेश सरकारले खेलेको भूमिकालाई लिएर भन्ने हो भने प्रदेश सरकार सरकार जस्तो नभएर ईकाई जस्तो भयो । विकास, बजेट निर्माण अरु कुरा त सबै गरेकै छ प्रदेश सरकारले त्यसकारण संघीयताको मुल विषयमा प्रदेश सरकारलाई सरकार जस्तो बनाउने विषयमा हामी चुकेका छौँ । प्रदेश आफैंले काम गर्न सक्दैन । केन्द्रले सहयोग गर्न चाहाँदैन । समस्या यहाँबाट नै भइहाल्यो नि । हामी संसदबाट मन्त्री प्रधानमन्त्री नहुँदासम्म आदर्शका कुरा गर्छौँ । पुगेपछि सबै त्यस्तै हो । त्यसकारण हाम्रो यो मानसिकता प्रतिवर्तन गर्न आवश्यक छ ।’
उहाँले सबै राजनीतिक दलहरुले संघीयतासम्बन्धी मानसिकता परिवर्तन गर्न जरुरी रहेको बताउनु भयो ।
