इन्ग्लिश प्रिमियर लिग क्लब चेल्सी काराबाओ कप फुटबलको चौंथो चरणमा प्रवेश गरेको छ ।बुधबार राति भएको खेलमा लिग टु क्लब ग्रिम्स्बी टाउनलाई ७–१ गोल अन्तरले पराजित गर्दै चेल्सी चौंथो चरणमा पुगेको हो । चेल्सीलाई फराकिलो जित दिलाउन मिची बात्सुआईले दुई गोल गरेका थिए ।
यस्तै रोस बार्क्ली, पेड्रो रोड्रिगेज, कुर्ट जौमा, रिसी जेम्स र कलुम हड्सनले एक एक गोल गरे । ग्रिम्स्बीका माथ्यु ग्रीनले सान्त्वना गोल फर्काएका थिए । स्टामफोर्ड ब्रिजमा चेल्सीले पहिलो हाफमा ३ र दोस्रो हाफमा ४ गोल गरी जम्मा ७ गोलको मजा ग्रिम्स्बी टाउनलाई चखाएको थियो ।
चौंथो चरणको खेलमा चेल्सीले म्यान्चेस्टर युनाइटेडको सामना गर्नेछ । युनाइटेड लिग वान क्लब रोचडेललाई पेनाल्टी सुटआउटमा ५–३ गोल अन्तरले पराजित गर्दै म्यान्चेस्टर युनाइटेड चौंथो चरणमा पुगिसकेको छ ।
