काठमाडौं । राष्ट्रिय स्वतन्त्र पार्टी (रास्वपा)का सांसद गणेश कार्कीले सरकार वा पार्टीको बचाउका लागि मान्छेको जीवनभन्दा ठूलो तर्क नगर्न आग्रह गरेका छन्।
सामाजिक सञ्जालमार्फत आफ्नो धारणा सार्वजनिक गर्दै सांसद कार्कीले नियम मानिसका लागि बनाइने भएकाले नियमका कारण मानिसको जीवन नै संकटमा पर्ने अवस्था स्वीकार्य हुन नसक्ने बताएका हुन्।
उनले नियम पालन गर्दा मानिसलाई असहज हुने, नियम मान्नुभन्दा मर्नु सजिलो महसुस हुने अवस्था सिर्जना भएको भए त्यस्ता नियम पुनरावलोकन गर्नुपर्ने वा त्यसबारे नागरिकलाई अझ प्रभावकारी ढंगले बुझाउनुपर्ने आवश्यकता रहेको उल्लेख गरेका छन्।
कार्कीले ‘मान्छे र नियममध्ये कुन रोज्ने?’ भन्ने प्रश्न नै अनुचित भएको टिप्पणी गर्दै, यदि त्यसको जवाफ दिनै परे आफूले मान्छेलाई रोज्ने बताएका छन्।
उनले सरकार र रास्वपाका समर्थकलाई लक्षित गर्दै सरकार वा पार्टी जोगाउने नाममा मान्छेको ज्यानभन्दा भारी तर्क नगर्न आग्रह गरेका छन्।
साथै, नेपालमा दैनिक औसत १८ जनाले आत्महत्या गर्ने तथ्य स्मरण गराउँदै उनले आत्महत्याको प्रमुख कारण मानसिक स्वास्थ्य समस्या वा आवेग हुने उल्लेख गरेका छन्। यी दुवै अवस्थालाई समयमै सचेतना, जानकारी र सहयोगमार्फत कम गर्न सकिने भन्दै उनले यस विषयमा समाजमा खुला छलफल र जनचेतना अभिवृद्धि गर्नुपर्नेमा जोड दिएका छन्।
