युभेन्ट्स सिरि ‘ए’ फुटबलमा पुन शीर्ष स्थानमा फर्किएको छ । शनिबार राति भएको खेलमा युभेन्ट्सले टुरिनोलाई १–० गोल अन्तरले हराउँदै तालिकाको शीर्ष स्थानमा उक्लिएको हो ।युभेन्ट्सका लागि एक मात्र गोल म्याथिज डी लिग्टले खेलको ७० औ मिनेटमा गरेका थिए ।
उनैको गोलमा युभेन्ट्सले तीन अंक बटुल्दै तालिकाको शीर्ष स्थानमा पुनरागमन गरेको हो । उनी यसै सिजन ६७.५ मिलियन पाउण्डमा सिरि ‘ए’ क्लब आएका थिए । क्रिस्टियानो रोनाल्डोले पहिलो हाफमा गोलका दुई सुन्दर अवसर गुमाएका थिए । तर गोन्जालो हिग्युनको पासमा डी लिग्टले युभेन्ट्सको खाता खोलेका थिए ।
शीर्ष स्थानको युभेन्ट्सले ११ खेलबाट २९ अंक जोडेको छ । उसले दोस्रो स्थानको ईन्टर मिलानसंग एक अंकको अग्रता लिएको छ । टुरिनो ११ अंक सहित तालिकाको १३ औ स्थानमा छ ।
