काठमाडौं: स्पेनमा स्थायी आवासीय अनुमति (पिआर) दिने भएपछि युरोपमा रहेका धेरै नेपाली स्पेन पुगेका छन् ।
खासगरी युरोपका विभिन्न देशमा रहेर पनि स्थायी आवासीय अनुमति प्राप्त नगरेकाहरु स्पेनमा आवेदन दिन आइपुगेको स्पेनमै रहेका एक नेपालीले बताए । स्पेनमै पनि आवेदनका लागि फारम लिनकै लागि रातभर लाइनमा बस्ने गरेको स्पेनमा रहेका नेपालीको भनाई छ ।
स्पेनले गत डिसेम्बर ३१, २०२५ भित्र स्पेनमा बसोबास गरिरहेका कम्तीमा पाँच लाखभन्दा बढीलाई स्थायी आवासीय (पिआर) दिने घोषणा गरेको छ । नेपाली समुदाय समेत अन्य देशका नागरिक पनि पिआर आवेदन गर्न स्पेन पुगेका छन् ।
स्थायी अनुमतिका लागि आवेदकहरुले स्पेनमा बसोबास गरिरहेको प्रमाणका अतिरिक्त नेपालबाट चारित्रिक विवरण सहितको प्रहरी रिपोर्ट, परराष्ट्र मन्त्रालयको कन्सुलर विभागको छाप र नेपालस्थित स्पेनी कन्सुलरले स्टिकर (छाप) लगाउनु पर्नेछ ।
अहिले नेपालस्थित स्पेनी कन्सुलरमा सरदर दैनिक पाँच सय व्यक्तिले आवेदन दिएको बताइएको छ । आगामी मे महिनाभित्र स्पेनमा पिआरका लागि आवेदन दिनुपर्ने भए पनि नेपालस्थित स्पेनी कन्सुलरले माग भएजति आवेदन प्रोसेस गर्न सकिरहेको छैन ।
स्पेनी कन्सुलरले प्राप्त निवेदनका आधारमा स्टिकरका लागि भारतस्थित कन्सुलर, राजदूतावासमा पठाएर स्टिकर ल्याउने गरेको छ । विगतमा दैनिक करिब १० वटा स्टिकरको काम गर्ने कन्सुलरमा बढेका चापका कारण समस्या उत्पन्न भएको बताइएको छ ।
समयमै स्टिकर प्राप्त गर्न नसके स्पेनमा आवेदन दिन कठिनाई हुने भएकाले नेपालस्थित उनीहरुका आफन्त तनाबमा पुगेका छन् । यो समस्या सुल्झाउन नेपाल सरकारले पनि पहल गर्नुपर्ने खाँचो रहेको आवेदन दिन स्पेनी कन्सुलरमा भेटिएका एक व्यक्तिले बताएका छन् ।
फोटो- एआई
