काठमाडौं । गृहमन्त्री सुधन गुरुङले पछिल्ला दिनमा आफ्नो नाम जोडेर उठाइएका विभिन्न आरोप तथा चर्चाप्रति स्पष्टीकरण दिएका छन्।
उनले विषयलाई जटिल रूपमा प्रस्तुत गरिएको भन्दै वास्तविक तथ्य बुझ्न आवश्यक रहेको बताएका छन्।
उनका अनुसार २५ लाखको सेयर लुकाइएको भन्ने आरोप तथ्यमा आधारित छैन। उनले धितोपत्र बजारमा कारोबार हुने सेयरहरूबापत दुई करोड रुपैयाँभन्दा बढीको लगानी सम्पत्ति विवरणमै स्पष्ट रूपमा उल्लेख गरिसकेको दाबी गरे।
उक्त विवरण सबैले मन्त्रिपरिषद्को सम्बन्धित वेबसाइटमार्फत हेर्न सक्ने उनको भनाइ छ। स्टार माइक्रो इन्स्योरेन्स र लिबर्टी माइक्रोमा गरिएको लगानी पनि सोही विवरणभित्र समेटिएको भन्दै उनले यसलाई लुकाउने होइन, वर्गीकरणको विषय भएको स्पष्ट पारे।
मन्त्री बन्नुअघि सेयर खरिद गरिएको भन्ने आरोपबारे प्रतिक्रिया दिँदै उनले सेयरमा लगानी गर्नु कानुनी रूपमा अपराध नभएको बताए।
सबै कारोबार बैंकिङ प्रणालीमार्फत भएको उल्लेख गर्दै उनले पैसा कहाँ, कहिले र कसरी गएको भन्ने सम्पूर्ण विवरण बैंक रेकर्डमा स्पष्ट रहने दाबी गरे।
लगानी स्रोतबारे उनले ऋण (कर्जा) मार्फत रकम जुटाइएको जानकारी दिँदै २०८०/०५/२९ को लिखित तमसुकमार्फत उक्त प्रक्रिया प्रमाणित भएको बताए। बैंकिङ च्यानलमार्फत आएको रकम नै लगानीमा प्रयोग गरिएको भन्दै उनले स्रोतबारे कुनै अस्पष्टता नरहेको दाबी गरे।
विवादित व्यक्तिसँग साझेदारी गरिएको भन्ने आरोपलाई उनले अस्वीकार गर्दै एउटै कम्पनीमा सयौँदेखि हजारौँ सेयरहोल्डर हुने भएकाले सेयर खरिदलाई साझेदारी वा आपराधिक सम्बन्धको रूपमा व्याख्या गर्नु गलत हुने बताए। त्यस्ता कम्पनीमा बैंकदेखि मिडिया हाउससम्मको लगानी रहने भएकाले चयन गरेर आरोप लगाउनु न्यायोचित नहुने उनको भनाइ छ।
कन्फ्लिक्ट अफ इन्ट्रेस्ट सम्बन्धी आरोपबारे बोल्दै उनले यो विषय गृह मन्त्रालयको नभई अर्थ मन्त्रालय अन्तर्गतको सम्पत्ति शुद्धिकरण विभागले हेर्ने प्रक्रिया रहेको बताए। उक्त निकायले प्रक्रिया अनुसार अनुसन्धान गरिरहेको उल्लेख गर्दै उनले आफूले कुनै हस्तक्षेप नगरेको स्पष्ट पारे।
पृष्ठभूमि नजाँची लगानी गरिएको भन्ने आलोचनाबारे उनले व्यापारिक लगानीमा जोखिम स्वाभाविक हुने भन्दै पछि भएका घटनालाई आधार बनाएर पहिलेको निर्णयलाई दोष दिन नमिल्ने धारणा राखे।
समयमै प्रतिक्रिया नदिएको विषयमा उठेका प्रश्नलाई सम्बोधन गर्दै उनले संवेदनशील कानुनी विषयमा हतारमा बोल्नु उपयुक्त नहुने बताए। सत्य प्रमाणका आधारमा मात्र स्थापित हुने भएकाले हल्लाभन्दा तथ्यमा विश्वास गर्नुपर्ने उनको भनाइ थियो।
उनले आरोप र सत्य एउटै नभएको उल्लेख गर्दै निर्णय भावनामा होइन, प्रमाणका आधारमा हुनुपर्नेमा जोड दिए। पार्टीले गर्ने जुनसुकै निर्णय स्वीकार गर्ने र अनुसन्धानमा पूर्ण सहयोग गर्ने उनले प्रतिबद्धता व्यक्त गरे।
शहीदहरूको बलिदान र जेनजी आन्दोलनको मर्मले सबैलाई जिम्मेवार बनाएको भन्दै उनले हल्लामा होइन, प्रमाणमा उभिनुपर्ने निष्कर्ष निकाले।
