काठमाडौं । हालै सम्पन्न प्रतिनिधिसभा सदस्य निर्वाचनअन्तर्गत समानुपातिक निर्वाचन प्रणालीबाट निर्वाचित भएका ११० जना सांसदलाई आज निर्वाचन आयोगले प्रमाणपत्र प्रदान गर्ने भएको छ ।
पहिलो हुने निर्वाचिचत हुने प्रणाली अन्तर्गत विजयी हुनेले जिल्ला निर्वाचन कार्यालयबाटै प्रमाणपत्र पाएको भए पनि समानुपातिकले भने आज मात्र प्राप्त गर्ने भएका हुन् । साथै आयोगले गत सोमबार नै ११० जना समानुपातिक सांसदको सूची भने सार्वजनिक गरेको थियो ।
सार्वजनिक विवरणअनुसार राष्ट्रिय स्वतन्त्र पार्टी (रास्वपा)का ५७, नेपाली कांग्रेसबाट २०, नेकपा एमालेबाट १६, नेपाली कम्युनिष्ट पार्टीबाट ९, श्रम संस्कृति पार्टी र राष्ट्रिय प्रजातन्त्र पार्टी (राप्रपा) बाट चार-चार जना सांसद निर्वाचित भएका छन् ।
त्यसैगरी आजै निर्वाचन आयोगले प्रतिनिधिसभा सदस्य निर्वाचन, २०८२ को निर्वाचन परिणामसहितको समग्र प्रतिवेदन पनि राष्ट्रपति रामचन्द्र पौडेलसमक्ष बुझाइने आयोगले जनाएको छ ।
निर्वाचन परिणामसहितको समग्र प्रतिवेदन आज यो प्रतिवेदन बुझाएपछि नेपालको संविधान, २०७२ को धारा ७६ (१) अनुसार नयाँ सरकार गठन गर्नका लागि राष्ट्रपतिबाट आह्वान हुने छ । सम्भवत अर्काे हप्ता नेपालमा नयाँ सरकार गठन हुनेछ । नयाँ सरकार रास्वपाका वरिष्ठ नेता बालेन्द्र शाहको नेतृत्वमा बन्ने कुरा चुनाव अघि नै सो पार्टीले सार्वजनिक गरिसकेको छ ।
