काठमाडौं : सरकारले मुलुकमा शान्ति, सुरक्षा, सामाजिक तथा धार्मिक सद्भाव कायम राख्न सबै राजनीतिक दल, नागरिक समाज, धार्मिक संघ–संस्था, सञ्चारमाध्यम तथा सम्पूर्ण नागरिकलाई संयमता अपनाउँदै सहयोग गर्न आह्वान गरेको छ।
सुनसरीको देवानगञ्ज गाउँपालिका–३, कप्तानगञ्जमा साउन १० गते भएको हिंसात्मक घटनाप्रति गम्भीर ध्यानाकर्षण भएको जनाउदै पूर्वी नेपालका केही जिल्लामा उत्पन्न परिस्थितिप्रति पनि सरकार संवेदनशील रहेको बताएको छ।
प्रधानमन्त्री तथा मन्त्रिपरिषद्को कार्यालयले सोमबार जारी गरेको प्रेस विज्ञप्तिमा घटनामा ज्यान गुमाएका व्यक्तिप्रति श्रद्धाञ्जली व्यक्त गर्दै घाइते तथा सुरक्षाकर्मीहरूको शीघ्र स्वास्थ्य लाभको कामना गरिएको छ।
सरकारले घटनामा घाइते भएका सबैको निःशुल्क उपचार स्वास्थ्य तथा खाद्य स्वच्छता मन्त्रालयमार्फत गरिने व्यवस्था मिलाइएको जनाएको छ। साथै, घटनाको सत्यतथ्य छानबिन गरी आगामी दिनमा यस्ता घटना दोहोरिन नदिन आवश्यक सुझावसहित सात दिनभित्र प्रतिवेदन पेस गर्ने गरी गृह मन्त्रालयले छानबिन समिति गठन गरिसकेको र समितिले काम सुरु गरिसकेको जानकारी दिएको छ।
विज्ञप्तिमा पीडित पक्षलाई उचित क्षतिपूर्ति उपलब्ध गराइने तथा घटनाका दोषीमाथि कडा कानुनी कारबाही गरिने प्रतिबद्धता व्यक्त गरिएको छ।
सरकारले कुनै पनि समस्या, असन्तुष्टि वा विवादको समाधान हिंसाबाट सम्भव नहुने उल्लेख गर्दै धार्मिक सहिष्णुता, सामाजिक सद्भाव र आपसी एकता कायम राख्न सबैलाई आग्रह गरेको छ। साथै, भ्रामक सूचना र अफवाह नफैलाउन तथा त्यस्ता सूचनाबाट प्रभावित नहुन पनि अपिल गरेको छ।
यसैबीच, सरकारले मुलुकमा शान्ति, सुरक्षा, सामाजिक तथा धार्मिक सद्भाव कायम राख्न सबै राजनीतिक दल, नागरिक समाज, धार्मिक संघ–संस्था, सञ्चारमाध्यम तथा सम्पूर्ण नागरिकलाई संयमता अपनाउँदै सहयोग गर्न आह्वान गरेको छ।
