देशभरको तापक्रम अझै केही दिन घट्ने भएको छ । आकाशमा कुहिरो, हुस्सु, तुवाँलो कम लागेकाले अझै चिसो बढ्ने अनुमान गरिएको हो । ‘अहिले मौसम सक्रिय भई बादल लाग्ने वा अरु कुहिरो हुस्सु थप बढ्ने सम्भावना छैन । आकाश जति खाली हुन्छ त्यति धेरै चिसो बढ्छ,’ जल तथा मौसम विज्ञान विभाग पूर्वानुमान महाशाखाका मौसमविज्ञ मीनकुमार अर्यालले भने, ‘काठमाडौंलगायत पहाडी, हिमाली क्षेत्रमा मौसम सफा छ । तराई क्षेत्रमा भने बिहान कुहिरो, दिउँसो तुवाँलो छ ।’
यस साताभर न्यूनतम २ डिग्रीदेखि शून्य डिग्रीसम्म चिसो झर्न सक्ने प्रक्षेपण गरिएको छ । तराईमा दुई सातादेखि बिहान कुहिरो र दिउँसो तुवाँलोले गर्दा नियमित घाम लाग्न सकेको छैन । ‘तराईमा शीतलहर चलेको छैन । पछिल्लो १०/१५ दिनदेखि छिनछिनमा घाम लाग्ने–नलाग्ने भइरहेको छ,’ अर्यालले भने ।
काठमाडौंमा बिहीबार शून्य दशमलव ९ डिग्री तापक्रम पुगेको छ । जुम्लामा माइनस ७ डिग्री, जिरीमा न्यूनतम माइनस ३ दशमलव ५ डिग्री, दाङ र जोमसोममा शून्य डिग्री, डडेलधुरामा १ दशमलव ७ डिग्री पुगेको छ ।
