काठमाडौं ।प्रधानमन्त्री वालेन्द्र शाहले नेपालमा हालै आएको बाढी तथा पहिरोपछि अष्ट्रेलिया सरकारले देखाएको मित्रता, एक्यबद्धता र सहयोगप्रति कृतज्ञता व्यक्त गरेका छन्।
नेपालका लागि अष्ट्रेलियाका राजदूत साइमन अर्न्स्टले बिहीबार सिंहदरबारस्थित प्रधानमन्त्री तथा मन्त्रिपरिषद्को कार्यालयमा गरेको शिष्टाचार भेटका क्रममा प्रधानमन्त्री शाहले अष्ट्रेलिया सरकारको सहयोगप्रति आभार व्यक्त गरेका हुन्।
भेटमा प्रधानमन्त्री शाहले बाढी तथा पहिरोबाट ठूलो जनधनको क्षति भएको उल्लेख गर्दै नेपाल सरकारले खोज, उद्धार, राहत तथा पुनःस्थापनाका लागि उपलब्ध सम्पूर्ण स्रोतसाधन परिचालन गरिरहेको जानकारी दिए।
विपद्पछि अष्ट्रेलियाले विशेषज्ञ ड्रोन अपरेटर, राहत सामग्रीसहित १७ सदस्यीय विपद् सहकार्य तथा प्रतिकार्य टोली नेपाल पठाएकोमा प्रधानमन्त्री शाहले प्रशंसा गरे। अष्ट्रेलियाले उपलब्ध गराएको ११ मिलियन अष्ट्रेलियन डलर सहयोग दुई देशबीचको प्रगाढ सम्बन्धको प्रतीक भएको उनको भनाइ थियो।
प्रधानमन्त्री शाहले बाढीका कारण बेपत्ता रहेका अष्ट्रेलियन नागरिकको खोजी कार्यलाई नेपाल सरकारले उच्च प्राथमिकतामा राखेर अघि बढाइरहेको बताए। साथै, नेपालको मानव संसाधन विकासमा अष्ट्रेलियाले निरन्तर पुर्याउँदै आएको सहयोगका लागि पनि उनले धन्यवाद व्यक्त गरे।
भेटमा राजदूत साइमन अर्न्स्टले प्राकृतिक विपद्का कारण नेपालले बेहोरेको क्षतिप्रति समवेदना व्यक्त गर्दै हालै संयुक्त राष्ट्रसंघमा नेपालले जनाएको सक्रिय र प्रभावकारी उपस्थितिको प्रशंसा गरेका थिए।
