काठमाडौं । श्रम संस्कृति पार्टीका प्रमुख सचेतक आरेन राईले सरकारको कार्यसम्पादनप्रति असन्तुष्टि जनाउँदै जनताका दैनिक जीवनसँग जोडिएका समस्यामा परिणाम देखिने गरी काम गर्न आग्रह गरेका छन्।
बिहीबार प्रतिनिधि सभा बैठकमा बोल्दै राईले रेमिट्यान्समा निर्भर अर्थतन्त्र, युवाको बढ्दो विदेश पलायन, महँगी, भ्रष्टाचार र शिक्षा क्षेत्रका समस्याप्रति सरकार गम्भीर नदेखिएको आरोप लगाए। सरकारको सुशासनसम्बन्धी प्रतिबद्धता व्यवहारमा भन्दा नारामै सीमित भएको उनको भनाइ थियो।
उनले निर्वाचन क्षेत्रमा विकास निर्माणका आयोजना अलपत्र परेको तथा सरकारी विद्यालयको शैक्षिक गुणस्तर खस्किँदै गएको भन्दै सरकारको ध्यानाकर्षण गराए। भ्रष्टाचारका पुराना फाइल खोल्ने सरकारको दाबी कार्यान्वयनमा आउन नसकेको भन्दै उनले त्यसबारे पनि प्रश्न उठाए।
‘गिरिबन्धु टी-स्टेट होस् वा ह्वाइट बडी काण्ड, तपाईंहरूले ठूलो छाती भएको दाबी गर्नुहुन्थ्यो, के कुराले रोक्यो? पपुलारिटीका लागि मात्र बोल्ने हो कि?,’ राईले प्रश्न गरे।
उनले सरकारसँग रहेको राजनीतिक शक्तिको प्रयोग गर्दै भ्रष्टाचारमा संलग्नलाई कारबाही गर्न चुनौती दिए। भ्रष्टाचारविरुद्ध सरकारले अघि बढाउने जुनसुकै प्रक्रियामा आफ्नो पार्टी सहयोग गर्न तयार रहेको उनले बताए।
राईले श्रमिक तथा किसानका समस्यासमेत सरकारले प्रभावकारी रूपमा सम्बोधन गर्न नसकेको आरोप लगाए। आफूहरूले पटक–पटक उठाउँदै आएको ‘फ्रि भिसा, फ्रि टिकट’को विषयमा पनि सरकारले टालटुले काम मात्रै गरेको उनको भनाइ थियो।
‘आफैँले खनेको खाल्डोमा आफैँ डुब्ने काम नहोस्। आन्दोलनकारीलाई जेल हालेर परिवर्तन आउँदैन,’ उनले भने।
राईले जेनजी आन्दोलनका क्रममा सरकारले गरेको दमनप्रति समेत असन्तुष्टि जनाए। साथै, संसद् बैठक सञ्चालनमा नरहेको समयमा संघीयता, लोकतन्त्र र समावेशिताविरुद्ध कुनै पनि ‘कुचेष्टा’ नगर्न उनले सरकारलाई सचेत गराए।
