काठमाडौं । नेकपा (एमाले) की सांसद साजिदा खातुन सिद्धिकीले सरकारको सुशासनसम्बन्धी दाबी र सरकारी निकायमा देखिएको कार्यशैलीबीच विरोधाभास रहेको बताएकी छन्।
बिहीबार प्रतिनिधिसभाको बैठकमा बोल्दै उनले सरकारी निकायमा हुने नियुक्तिमा ढिलाइ, प्रक्रियागत अन्योल र लामो समयसम्म निमित्त प्रमुखबाट काम चलाउने प्रवृत्तिले सरकारको सुशासनको नारामाथि प्रश्न उठाएको बताइन्।
सांसद सिद्धिकीले नेपाल फार्मेसी परिषद्को नियुक्ति प्रक्रियामा भएको ढिलाइलाई उदाहरणका रूपमा प्रस्तुत गरिन्। नियुक्तिका लागि सूचना जारी गरी तोकिएको समयभित्र अन्तर्वार्तासमेत सम्पन्न भइसकेको भए पनि २१ दिनसम्म नतिजा सार्वजनिक नगरिएको उनको भनाइ थियो।
पुरानो प्रक्रिया टुंग्याउनुपर्ने अवस्थामा त्यसलाई लम्ब्याएर नयाँ प्रक्रिया अघि बढाउने र आफू निकटका व्यक्तिलाई नियुक्त गर्ने प्रयास भएको हुन सक्ने भन्दै उनले आपत्ति जनाइन्। उनले नियुक्ति प्रक्रियामा पारदर्शिता र निष्पक्षता कायम गर्न सरकारको ध्यानाकर्षण गराइन्।
‘सुशासनको नारा सरकारकै हो तर कस्तो सुशासन हो यो ? आफ्ना प्रिय पात्रलाई नियुक्त गराउन प्रक्रियालाई लम्ब्याउने र जनतालाई झुक्क्याउने काम भइरहेको छ,’ उनले प्रश्न गरिन्।
सरकारी निकायमा एउटा निमित्त प्रमुख हुँदाहुँदै अर्को निमित्त नियुक्त गर्ने तथा लामो समयसम्म स्थायी नेतृत्व चयन नगरी निमित्तकै भरमा संस्था सञ्चालन गर्ने प्रवृत्तिले प्रशासनिक प्रणालीमा समेत नकारात्मक असर पार्ने उनको भनाइ थियो।
सिद्धिकीले नियुक्ति प्रक्रियालाई पारदर्शी, प्रतिस्पर्धात्मक र नियमसम्मत बनाउन सरकार गम्भीर हुनुपर्ने बताइन्।
