काठमाडौँ: इरानमा अमेरिका र इजरायलले गरेको आक्रमणपछि बढेको तनावले सिंगो खाडी क्षेत्र नै प्रभावित भएको छ । खाडीका कैयौँ देशमा इरानले हमला गरिरहेको छ । इरानमाथिको आक्रमणको विरुद्धमा खाडीका अन्य देशहरुमा अमेरिकी सैन्य अखडा रहेका स्थानमा इरानले सो आक्रमण गरेको हो ।
यसैबीच गएको शनिबार यतादेखि बढ्दो तनावका बिचमा संयुक्त राज्य अमेरिकाले मध्यपूर्व र खाडी मुलुकमा रहेका आफ्ना दुतावास तथा मिसनहरु बन्द गर्ने घोषणा गरेको छ । साथै अमेरिकाले हिजो नै ती तनावग्रस्त देशमा रहेका कर्मचारी र नागरिकलाई देश छोड्न आदेश पनि दिएको छ ।
अमेरिकाको विदेश मन्त्रालयले साउदी अरबको रियादस्थित अमेरिकी दूतावास मङ्गलबारदेखि नै बन्द भएको जनाएको छ । सामाजिक सञ्जाल एक्समा दूतावासले साउदी अरबमा रहेका अमेरिकी नागरिकलाई दुतावास परिसरबाट टाढा रहन आग्रह गरेको छ । यस अघि साउदी अरबका अधिकारीले रियादमा रहेको दूतावासमा दुई वटा ड्रोन प्रहार गरेको पुष्टि गरेका थिए ।
कुवेतस्थित अमेरिकी दूतावासले पनि अर्को सूचना जारी नभएसम्म सम्पुर्ण सेवा निलम्बन गरेको जानकारी दिएको छ । अमेरिकी विदेश विभागले गैर–आवासिय कर्मचारी उनीहरुका परिवारका सदस्यलाई बहराइन, जोर्डन र इराक छोड्न आदेश दिएको छ । विभागले सरकारी कर्मचारी र उनीहरूका परिवारलाई स्वैच्छिक प्रस्थानको अनुमति दिन बहराइन, जोर्डन र इराकलाई अनुरोधसमेत गरेको जनाइएको छ ।
यसैबीच मध्यपूर्व क्षेत्रमा विकसित परिस्थितिका सन्दर्भमा संयुक्त अरब इमिरेट्स (युएई) मा रहेका नेपालीको अवस्थासम्बन्धी सूचना सङ्कलन गर्न र आवश्यक परेमा उनीहरुको उद्धार समेतका लागि पनि परराष्ट्र मन्त्रालयले पोर्टल निर्माण गरेको र सो पोर्टलमा दर्ता हुन आउन पनि आग्रह गरेको छ ।
विभिन्न मुलुकबाट नेपाल फर्कने सिलसिलामा यूएईका विमानस्थलमा अलपत्र परेका र भिसा समाप्त भएका वा कम्पनीमा भिसा रद्ध गरी नेपाल फर्कन टिकट काटिसकेपछि असहज परिस्थितिमा परेका नेपाली नागरिकलाई पोर्टलमा आफ्नो विवरण यथाशीघ्र अद्यावधिक गर्न हार्दिक नेपालको परराष्ट्र मन्त्रालयले अनुरोध गरेको छ ।
