काठमाडौँ। नेपाल क्रिकेट संघ (क्यान) ले आईसीसी पुरुष क्रिकेट विश्वकप लिग-२ को आगामी श्रृंखलाका लागि बन्द प्रशिक्षणमा रहने २० सदस्यीय प्रारम्भिक टोलीको घोषणा गरेको छ ।
रोहित पौडेलको कप्तानीमा घोषणा गरिएको यस टोलीमा अनुभवी खेलाडीहरूसँगै केही युवा प्रतिभाहरूलाई पनि स्थान दिइएको छ।
टोलीको उप-कप्तानमा अलराउन्डर दीपेन्द्र सिंह ऐरी रहेका छन् । घोषित टोलीमा स्टार स्पिनर सन्दीप लामिछाने, तीव्र गतिका बलर सोमपाल कामी र करण केसी रहेका छन्। ब्याटिङतर्फ कुशल भुर्तेल, आसिफ शेख र भीम सार्कीले आफ्नो स्थान सुरक्षित गरेका छन् भने विकेटकिपर ब्याटरका रूपमा अर्जुन साउद टोलीमा छन् ।
यस पटकको बन्द प्रशिक्षणमा हेमन्त धामी, आकाश चन्द, रिजन ढकाल र नन्दन यादव जस्ता युवा बलरहरूलाई पनि समावेश गरिएको छ । उनीहरूले प्रशिक्षणको प्रदर्शनका आधारमा अन्तिम टोलीमा स्थान बनाउने मौका पाउनेछन् ।
भारत र श्रीलंकामा जारी टी-२० विश्वकप खेलेर फर्किएको नेपाली टोलीका सदस्य लोकेश बम र सन्दीप जोरा भने प्रारम्भिक टोलीमा परेका छैनन्।
अन्तर्राष्ट्रिय क्रिकेट परिषद् (आईसीसी)को आयोजनामा प्रतियोगिता हुन लागेको हो। नेपाल, ओमन र यूएई सम्मिलित हुने प्रतियोगिता फागुन २६ देखि चैत ६ गतेसम्म नेपालमा हुनेछ।
