मुगु । छयानाथ रारा नगरपालिका–१४ बाम रोल्का गाउँमा शनिबार राती आगलागी भएको छ । आगलागीमा दुई घर, पुशुचौपाया, फलफूललगायत जलेर नष्ट भएका छन् । आगलागीमा दानबहादुर बढुवाल र तीर्थबहादुर बुढाका घर पशुचौपाया, फलफूल जलेर नष्ट भएका हुन् । शनिबार राती एकासि आगलागी भएको र आगलागीमा परी स्थानीय दानबहादुर बढुवाल र तीर्थ बुढाको घरसमेत जलेर नष्ट भएको जिल्ला प्रहरी कार्यालय मुगुले जनाएको छ । आगलागी के कसरी भएको भन्ने एकिन भएको छैन ।
आगलागी भएको स्थान सदरमुकाम गमगढीबाट चार घण्टा टाढा भएको र आगलागीको जानकारी आइतबार मात्रै आएकाले सो घटनाबारे बुझ्न प्रहरी घटनास्थल जाने जिल्ला प्रहरी कार्यालय मुगुका प्रहरी नायव उपरीक्षक भुवनेश्वरप्रसाद साहाले बताए । उनका अनुसार प्रहरीले सम्बन्धित घटनाको जाँचबुझपछि मात्र क्षतिको विवरणका बारेमा भन्न मिल्ने प्रहरी नायव उपरीक्षक साहाको भनाइ छ ।
यसैबीच आगलागिपछि सौर्यदैनिकलाई जानकारी दिँदै आगलागीपीडित दानबहादुर बुढा र तीर्थ बुढाले शपनबार आगलागी भएको बताउँदै दानबहादुर बुढाका ७० वाख्रा र १५ क्विन्टल स्याउ, २० हजार नगद, अन्नपात लत्ताकपडा, भाडावर्तन, नागरिकता जलेका छन् । त्यस्तै, तीर्थ बुढाका ९० हजार नगद, १५ क्विन्टल स्याउ, १० वटा कुखुरा, १ सय ४० लिटर डिजेल, खरायो, अन्नपात लत्ताकपडा, भाडावर्तत जलेर नष्ट भएका आगलागी पीडितले जानकारी दिए ।
