क्वालालम्पुर। मलेसियाका १०० वर्षीय पूर्वप्रधानमन्त्री महाथिर मोहम्मदको उमेरका कारण उपचारका लागि शल्यक्रिया उत्तम विकल्प नभएको चिकित्सकहरूले सल्लाह दिएको उहाँका छोरा मुखरिजले बुधबार बताउनुभएको छ ।
उमेरजन्य समस्याका कारण घरमै लडेर कम्मरको हाडमा समस्या भएको भएपनि १०० बर्ष वसन्त पार गरिसकेका उहाँको उपचारका लागि शल्यक्रिया उत्तम विकल्प नभएको चिकित्सकहरूले सल्लाह दिएका छन् ।
घरमा लडी कम्मरमा समस्या भएपछि उहाँलाई मङ्गलबार एम्बुलेन्सबाट क्वालालम्पुरस्थित नेशनल हार्ट इन्स्टिच्युटमा लगिएको उहाँका सहयोगी सुफी युसुफले एएफपीलाई बताए ।
हालैका वर्षहरूमा स्वास्थ्य समस्याबाट पीडित महाथिरलाई जुलाईमा आफ्नो शतवार्षिकी मनाउने क्रममा वनभोजमा सहभागी भएपछि अनपेक्षित शारिरीक थकानका कारण अस्पताल भर्ना गरिएको थियो ।
सुफीका अनुसार चिकित्सकहरूले उहाँको दाहिने कम्मरमा समस्या देखिएको पुष्टि गरेका छन् र पूर्व प्रधानमन्त्री ‘उपचार र स्वास्थ्य निगरानीका लागि अर्को केही हप्ता’ अस्पतालमा बस्ने अपेक्षा गरिएको छ ।
महाथिरका छोरा मुखरिजले महाथिर घरभित्रै लड्नुभएको बताउनुभयो । “विशेष गरी शताब्दी पुरूष महाथिरको उमेरका कारण शल्यक्रिया राम्रो विकल्प होइन,” मुखरिजले आफ्नो राजनीतिक पार्टीको ह्वाट्सएप ग्रुप च्याटमा पोस्ट गरेको एक भिडियोमा चिकित्सकको सुझाबलाई उद्धृत गर्दै भन्नुभएको छ।
उहाँले भन्नुभयो, “अस्पतालका विशेषज्ञहरूले उहाँलाई एक विशेष पुनः स्थापना प्रक्रियाबाट अघि बढ्ने सल्लाह हामीलाई दिएका छन् र यसका लागि केही समय लाग्नेछ ।”
“निःसन्देह पनि उहाँ आफ्नो सामान्य स्वास्थ्यको अवस्थामा फर्कनु र आफ्नो कर्तव्यहरू जारी राख्न सक्षम बनाउने लक्ष्यसहित उपचार भइरहेको छ,” उहाँले भन्नुभयो ।
मुखरिजले उहाँको शीघ्र स्वास्थ्यलाभको लागि कामना र प्रार्थना गर्नेहरूलाई पनि धन्यवाद दिनुभयो र गोपनीयताका लागि अपिल गर्नुभयो ।
उहाँले भन्नुभयो, “पिता (महाथिर) लाई आराम गर्न आवश्यक छ म सबैसँग अनुरोध गर्दछु कि पूर्ण रूपमा निको हुँदासम्म उहाँलाई अरामको लागि वातावरण आवश्यक हुनेछ।”
मलेसियाका राजनीतिक दिग्गज मानिने महाथिरले पहिले मुटुको समस्याको लागि बाइपास सर्जरी गर्नुर्भको थियो ।
उहाँ सन् १९८१ देखि सन् २००३ सम्म र सन् २०१८ देखि २०२० सम्म दुई पटकसम्म प्रधानमन्त्री बन्नुभएको थियो ।
दोस्रो कार्यकालमा उहाँ ९४ वर्षको हुनुहुन्थ्यो र तत्कालिन विश्वकै सबैभन्दा वृद्ध निर्वाचित नेता हुनुहुन्थ्यो । (रासस/एएफपी)
