काठमाडौं। गत भदौ २४ गतेको जेनजी आन्दोलनका क्रममा भएको घुसपैठबाट आक्रमणमा परेको मौलाकाली केबलकारको पुनर्निर्माण सम्पन्न भएसँगै सञ्चालनमा आउने अन्तिम तयारी भएको छ ।
निर्माण कार्य सम्पन्न भई हिजोबाट परीक्षण सञ्चालन भएको र परीक्षण सफल भएपछि अबको एक दुई दिनमा सर्वसाधारण सबैका लागि खुला हुने सो केबलकारका संस्थापक एवं नेपाल उद्योग वाणिज्य महासंघका अध्यक्ष चन्द्रप्रसाद ढकालले जानकारी दिनुभएको छ ।
उहाँले आज फेसबुकमा भन्नुभएको छ– बटम स्टेशनका संरचनाहरूको आवश्यक मर्मत–सम्भार सम्पन्न भइसकेको छ । अब केबलकार सेवा तथा माथिल्लो स्टेशनमा अवस्थित इला होटल एण्ड रिसोर्ट दुवै पूर्ण रूपमा सञ्चालनमा आएका छन् । हिजो आइतबार बेलुकादेखि प्राविधिक परीक्षण सफल भइ केबलकार पनि सञ्चालनमा आएको छ । अब एक दुई दिनको परीक्षण पश्चात सर्वसाधारण एवं सबैका लागि खुल्ला हुनेछ ।
सो आन्दोलनका कारण काठमाडौँको चन्द्रागिरि र चितवनस्थि मौलाकाली केबलकारमा आगजनी भएको थियो । आगजनी तथा तोडफोडका क्रममा चन्द्रागिरि भन्दा पनि बढी मौलाकालीमा क्षति पुगेको थियो ।
मौलाकाली केबलकारको बटम स्टेसन र त्यहाँ पार्किङ गरी राखिएका गोण्डुलाहरुमा नै आगो लगाइएको थियो । त्यसपछि यी दुवै केबलकार निर्माण गरेको विदेशी कम्पनीबाट नै जनशक्ति र सामान मगाएर निर्माण कार्य सुरु भएको थियो । सो प्राविधिक समूहले चन्द्रागिरि निर्माण सम्पन्न गरेपछि मौलाकालीमा काम गर्न गएका थिए । चन्द्रागिरि भने गत हप्तादेखि नै सञ्चालनमा आएको छ ।
यता मौलाकालीको निर्माण सम्पन्न भएर परीक्षण सफल भएसँगै अध्यक्ष ढकालले आज फेसबुकमा लेख्नुभएको छ– हामी अझ सबल र सक्षम रूपमा तपाईंहरूको सेवामा फर्किएका छौँ ।
आन्तरिक तथा बाह्य पर्यटन प्रवद्र्धनमार्फत स्थानीय समुदायको आर्थिक र सामाजिक रूपान्तरणमा योगदान पु¥याउँदै, मुलुकको समग्र विकास तथा नेपाल सरकारको लक्ष्य हासिल गर्न सहयोग गर्नु हाम्रो दायित्व हो भन्ने हामी दृढतापूर्वक विश्वास गर्छौँ । हामी नयाँ ऊर्जा, नयाँ उत्साह र अझ स्तरीय सेवामा पूर्ण रूपमा समर्पित रहनेछौँ ।
उहाँले अप्ठ्यारो परिस्थितिमा साथ, सहयोग, हौसला र विश्वास प्रकट गर्ने नेपाल सरकारका विभिन्न निकाय, राजनीतिक दल, संघ–संस्था, स्थानीय समुदाय, उद्यमी व्यवसायी तथा शेयरहोल्डर, सञ्चारकर्मी लगायत सबैमा आभार पनि व्यक्त गर्नुभएको छ ।
