काठमाडौं । राष्ट्रिय मुक्ति पार्टी, नेपालका अध्यक्ष राजेन्द्र महतोले मुलुकमा बढ्दै गएको साम्प्रदायिक दंगा नियन्त्रण गरी सामाजिक सद्भाव कायम गर्न सरकारसँग माग गर्नुभएको छ ।
शुक्रबार सिंहदरबारमा प्रधानमन्त्रीसँग भेटवार्तापछि सञ्चारकर्मीसँग कुरा गर्दै अध्यक्ष महतोले मधेसलगायतका क्षेत्रमा फैलिएको अशान्ति रोक्न राज्यले समयमै ठोस कदम चाल्नुपर्ने बताउनुभयो ।
भेटका क्रममा महतोले सुनसरी, सिराहालगायत जिल्लामा पछिल्लो समय भएका घटनाप्रति गम्भीर चिन्ता व्यक्त गर्नुभएको थियो । उहाँले शान्ति सुरक्षा कायम गर्ने क्रममा सुरक्षा निकायबाट कम्मरभन्दा माथि गोली प्रहार भएको भन्दै घटनाको छानबिन गरी दोषीमाथि कारबाही गर्न माग गर्नुभयो ।
महतोले सरकार र आन्दोलनरत पक्षबीच विगतमा भएका सम्झौताहरू कार्यान्वयन गर्न पनि प्रधानमन्त्रीको ध्यानाकर्षण गराउनुभयो । उहाँले विगतका सहमतिहरू जस्तै वर्तमान सरकारसँग भएका सम्झौता पनि ‘रद्दीको टोकरी’मा नफाल्न आग्रह गर्नुभयो ।
वि.सं. २०६४ सालको आठबुँदे सम्झौतालगायत विगतका सहमति कार्यान्वयन नभएको स्मरण गराउँदै महतोले वर्तमान सरकारले पनि विश्वासघात नगर्न चेतावनी दिनुभयो ।
‘मान्छे मान्छेबाट डराउनुपर्ने अवस्था देश र समाजको हितमा छैन । सामाजिक सद्भाव कायम राख्न प्रधानमन्त्रीले थप तदारुकताका साथ पहल गर्नुपर्छ,’ उहाँले भन्नुभयो, ‘मधेसकै जनमतका कारण वर्तमान सरकार दुई तिहाइको अवस्थामा पुगेको हो । त्यसैले जनताको भावना र संघीयतालाई अधिकारसम्पन्न बनाउने विषयमा सरकार गम्भीर हुनुपर्छ ।’
महतोले प्रधानमन्त्रीले जनकपुरमा सार्वजनिक रूपमा व्यक्त गर्नुभएको ‘बलियो संघीयता’ निर्माण गर्ने प्रतिबद्धतालाई व्यवहारमा कार्यान्वयन गर्न पनि आग्रह गर्नुभयो ।
प्रधानमन्त्रीले संघीयताप्रति सरकार पूर्ण रूपमा प्रतिबद्ध रहेको र संघीयतालाई कमजोर पार्ने कुनै सोच नरहेको स्पष्ट पार्नुभएको महतोले जानकारी दिनुभयो ।
त्यस्तै, प्रधानमन्त्रीले सुनसरी घटनाबारे छानबिन समिति गठन भइसकेको र समितिको प्रतिवेदन आएपछि दोषीमाथि कारबाही गर्ने आश्वासन दिनुभएको महतोले बताउनुभयो । प्रधानमन्त्रीले साम्प्रदायिक दंगा फैलाएर अनुचित लाभ लिन खोज्ने तत्वहरूबाट सतर्क रहन तथा प्राप्त उपलब्धिहरूको रक्षा गर्दै अघि बढ्न पनि आग्रह गर्नुभएको उहाँले जानकारी दिनुभयो ।
