काठमाडौँ । मधेस केन्द्रित राजनीतिक दलका नेताहरूले प्रधानमन्त्री वालेन्द्र शाहसँग भएको छलफल सकारात्मक भएको बताउनुभएको छ ।
शुक्रबार सिंहदरबारस्थित प्रधानमन्त्री तथा मन्त्रिपरिषद्को कार्यालयमा प्रधानमन्त्री शाहसँग छलफल गरेपछि सञ्चारकर्मीसँग कुरा गर्दै नेताहरूले तराईका केही जिल्लामा पछिल्लो समय देखिएका समस्या समाधानका लागि छलफलले महत्वपूर्ण भूमिका खेल्ने बताउनुभयो ।
उहाँहरूले तराईका जिल्लामा देखिएको समस्या समाधानका लागि प्रधानमन्त्रीलाई विभिन्न सुझाव दिएको र समस्या समाधानप्रति प्रधानमन्त्री संवेदनशील र प्रतिबद्ध रहेको आफूहरूले पाएको बताउनुभयो ।
जनमत पार्टीका अध्यक्ष डा. सीके राउतले प्रधानमन्त्री शाहले पहिलोपटक मधेस केन्द्रित राजनीतिक दलका नेताहरूसँग छलफल गरेको भन्दै यसलाई सकारात्मक पहलका रूपमा लिएको बताउनुभयो । उहाँले तराईका केही जिल्लामा देखिएको समस्या समाधानका लागि आफूहरूले सुझाव दिएको जानकारी दिनुभयो ।
अध्यक्ष राउतले पछिल्लो समय तराईका केही जिल्लामा देखिएका समस्या नयाँ नभएको भन्दै यसको दीर्घकालीन समाधानका लागि प्रधानमन्त्रीको ध्यानाकर्षण गराइएको बताउनुभयो । समस्या समाधानका लागि ‘र्यापिड एक्सन टिम’ गठन गर्न, नियमित ब्रिफिङ गर्न, सुरक्षा जनशक्तिको क्षमता अभिवृद्धि गर्न तथा समुदायस्तरमा नियमन र समन्वय बढाउन सुझाव दिइएको उहाँले जानकारी दिनुभयो ।
मुस्लिम आयोगका संस्थापक अध्यक्ष समिम मियाँ अन्सारीले व्यक्तिगत विवाद साम्प्रदायिक तहसम्म पुग्नु मुलुकका लागि घातक हुने बताउनुभयो । उहाँले घटनाका दोषीलाई कारबाही गर्दै अवस्था सामान्य बनाउन प्रधानमन्त्रीसँग गम्भीर छलफल भएको र आवश्यक सुझाव दिइएको जानकारी दिनुभयो ।
राष्ट्रिय मुक्ति पार्टीका अध्यक्ष राजेन्द्र महतोले विगतका सरकारले मधेससँग गरेका सम्झौता कार्यान्वयन गर्न प्रधानमन्त्रीलाई सुझाव दिएको बताउनुभयो । मधेसमा देखिएका समस्या समाधानका लागि सरकारको सक्रियता थप बढाउन आग्रह गरिएको उहाँले जानकारी दिनुभयो ।
सुनसरीमा भएको घटनाका सम्बन्धमा निष्पक्ष छानबिन गरी समयमै समस्या समाधान गर्न पनि प्रधानमन्त्रीसँग आग्रह गरिएको अध्यक्ष महतोले बताउनुभयो ।
छलफलमा डा. सीके राउत, महन्थ ठाकुर, राजेन्द्र महतो, लालबाबु राउत, समिम मियाँ अन्सारी, राम के. शर्मा, प्रभु साह, अमरेशकुमार सिंह, शरतसिंह भण्डारी, जयकान्त राउतलगायतका नेताहरू सहभागी हुनुहुन्थ्यो।
