काठमाडाैँ । सर्वोच्च अदालतका न्यायाधीश हरिप्रसाद फुयाँलले नेपालमा व्यावसायिक र विशिष्टीकृत अदालती रिपोर्टिङको आवश्यकता रहेको बताउनुभएको छ ।
शुक्रवार सर्वोच्च अदालतमा आयोजित ‘अदालती पत्रकारितासम्बन्धी मार्गदर्शन’ पुस्तक विमोचन कार्यक्रममा बोल्दै उहाँले न्यायपालिकाको गरिमा र कानूनी जटिलतालाई बुझेर गरिने रिपोर्टिङले मात्र लोकतन्त्रलाई बलियो बनाउने धारणा व्यक्त गर्नुभएको हो ।
न्यायाधीश फुयाँलले हाल मूलधारका सञ्चारमाध्यमले गर्ने रिपोर्टिङमा संस्थागत वैचारिक झुकाव (इन्क्लिनेसन) देखिने गरेको र त्यसले अदालतको वास्तविक छविमा असर पु¥याउने गरेको बताउनु भयो । अन्तर्राष्ट्रिय अभ्यासको उदाहरण दिँदै उहाँले भारतका ‘लाइभ ल’ र ‘बार एण्ड बेन्च’ जस्ता सञ्चार माध्यमहरूले केवल न्यायपालिका र कानूनी क्षेत्रका समाचार मात्र संप्रेषण गर्ने गरेको उल्लेख गर्नुभयो । नेपालमा पनि त्यस्तै विशिष्टीकृत पोर्टलहरूको आवश्यकता रहेको र त्यस्ता माध्यममा कानुनी क्षेत्रमै अभ्यस्त भएका व्यक्तिहरूले रिपोर्टिङ गर्दा सूचनाको आधिकारिकता बढ्ने उहाँको तर्क छ ।
डिजिटल क्षेत्र र सामाजिक सञ्चालको बढ्दो प्रभावका कारण नेपालको अदालती रिपोर्टिङ पनि ढिलोचाँडो विशेषज्ञता र विशिष्टीकरणको दिशामा अगाडि बढ्ने विश्वास उहाँले व्यक्त गर्नुभयो । अदालतले पनि पत्रकारहरूलाई अन्तर्राष्ट्रिय स्तरको कानूनी र न्यायिक रिपोर्टिङको अभ्यासका बारेमा जानकारी गराउने प्रयास गरिरहेको उहाँले जानकारी दिनुभयो । –
