काठमाडौं । मधेशवादी दलका नेताहरूसँगको भेटवार्ताका क्रममा प्रधानमन्त्री बालेन्द्र शाह (बालेन) ले आफू सङ्घीयताविरोधी नरहेको स्पष्ट पारेका छन् ।
प्रधानमन्त्रीसँगको भेटमा राष्ट्रिय मुक्ति पार्टीका अध्यक्ष राजेन्द्र महतोले राष्ट्रिय स्वतन्त्र पार्टी (रास्वपा) को चितवनमा सम्पन्न महाधिवेशनबाट सङ्घीयताविरोधी प्रस्ताव पारित भएको विषय उठाएका थिए । भेटपछि सञ्चारकर्मीसँग कुरा गर्दै महतोले आफूले सङ्घीयताको विषय उठाएपछि प्रधानमन्त्री शाहले सङ्घीयता बलियो बनाउने पक्षमा आफू रहेको जवाफ दिएको जानकारी दिए ।
महतोका अनुसार प्रधानमन्त्री शाहले सङ्घीयताविरोधी धारणा आफूले सपनामा समेत नसोचेको बताएका थिए । प्रधानमन्त्रीले महाधिवेशनबाट गलत सन्देश गएको भए त्यसलाई सच्याउनुपर्ने धारणा राखेको महतोले बताए ।
प्रधानमन्त्री शाहले प्रदेशहरूले पाएका अधिकार प्रभावकारी रूपमा प्रयोग गर्नुपर्नेमा जोड दिँदै सङ्घीयतालाई थप बलियो बनाउन आवश्यक सुधार गर्ने प्रतिबद्धता व्यक्त गरेको महतोको भनाइ छ ।
‘सङ्घीयतालाई बलियो बनाउन कहाँ–कहाँ कमी छन्, त्यसलाई सुधार गर्नुपर्छ । प्रदेशहरूले प्राप्त अधिकार पनि प्रयोग गर्नुपर्छ,’ प्रधानमन्त्रीको भनाइ उद्धृत गर्दै महतोले भने ।
