काठमाडौँ । नेपाली काँग्रेसका सांसद कृष्णप्रसाद सिटौलाले संविधान र संघीय लोकतान्त्रिक व्यवस्थाको रक्षाका लागि राष्ट्रिय एकताको आवश्यकता रहेको बताउनुभएको छ ।
संविधान दिवसको अवसरमा शुक्रवार काठमाडौंमा आयोजित ‘मौजुवा संविधान र यसका चुनौती’ विषयक विषयक अन्तरसंवाद कार्यक्रममा बोल्दै उहाँले यस्तो धारणा राख्नुभएको हो । उहाँले जेन–आन्दोलनपश्चात मुलुकमा संविधान विपरित गतिविधि भइरहेको भन्दै लोकतान्त्रिक मूल्य र संविधानको रक्षा गर्न दलहरूबीच आपसी सहकार्यको आवश्यक भएको बताउनु भयो ।
लामो संघर्षपछि प्राप्त संविधानलाई जोगाउन राष्ट्रिय एकतालाई मजबुत बनाउँदै अगाडि बढ्न जरुरी रहेको उहाँको भनाइ छ । उहाँले राष्ट्रिय एकता नै जनता, लोकतन्त्र, संवैधानिक व्यवस्था र संविधानको सुरक्षा कवच भएको उल्लेख गर्दै जनताका मुद्दा र मागलाई सम्बोधन गर्नेगरी दलहरु परिमार्जित हुन जरुरी रहेको बताउनु भयो । सिटौलाले कार्यपालिका, व्यवस्थापिका, न्यायपालिका तथा औद्योगिक–व्यापारिक क्षेत्रहरूमा आक्रमण हुँदा मुलुकको अर्थतन्त्र नै संकटमा परेको बताउनु भयो । भ्रष्टाचार, जनआक्रोश र सामाजिक असन्तोषलाई सम्बोधन गर्न दलहरु गम्भीर हुनुपर्ने धारणा राख्नुभयो ।
उहाँले भन्नुभयो, ‘संविधान विपरित कार्य भएको छ । नेपाली काँग्रेस एकतावद्ध रहेर अन्य दलहरुसँग पनि छलफल गर्नुपर्छ भन्ने आजै बसेको बैठक भएको छ । विगत लामो समयको संघर्षबाट प्राप्त उपलब्धी र जनताको सर्वोच्चताका रुपमा रहेको संविधान जोगाउन आवश्यक छ । राष्ट्रिय एकतालाई जति बलियो बनाउन सकियो त्यो नै अहिले जनता, लोकतन्त्र, संवैधानिक व्यवस्था र संविधानको सुरक्षा कवच हुन्छ । हामी सबैले एकताबद्ध भएर कार्यपालिका, व्यवस्थापिका र न्यायपालिकाको मनोबल उच्च बनाउनुपर्ने भएको छ । हाम्रो पार्टीको भित्र अनेक मत होला । तर अहिले मत मतान्तर र होडबाजी गर्ने बेला नभई एकताबद्ध भएर अगाडि बढ्ने हो । यो इतिहास लामो भएको छैन । हामीले यो इतिहासलाई सम्झिएर हाम्रा गतिविधि अगाडि हुनुपर्छ । अर्को कुरा, कार्यपालिका, व्यवस्थापिका, न्यायपालिका, औद्योगिक तथा व्यापारिक केन्द्रमा आक्रमण भएको छ । यो देशको अर्थतन्त्रमाथि आक्रमण भएको छ । यसको लुटपात र तोडफोड आजसम्म भएको थिएन । यो संकटबाट देशलाई मुक्त गर्न सबैलाई सम्झाएर अगाडि बढ्नुपर्छ ।’
उहाँले जेन–जी आन्दोलनका क्रममा सरकारद्वारा गरिएको दमनको समेत विरोध गर्नुभयो ।
